Vawiin chawhma dar 10:30 khan School Education Directorate Conference Hall-ah Samagra Shiksha Officer-te tan Orientation Training neih a ni a. State Project Office-a Officer te, District Project Office-a Officer te an tel a ni.

He Orientation training hi Commissioner & Secretary School Education Pi Esther Lalruatkimi leh Director Pi K.Lalrinzuali ten an hmanpui. Pi Esther Lalruatkimi chuan he training-ah hian thusawiin Samagra Shiksha Officer-te chu an hna thiam tur khawpa inzir turin a fuih a. Sum lama rinawm a pawimawhzia sawiin mahni sum kan vawng uluk a, sorkar sum hi chu aia uluk zawka vawn tur a ni tih te a sawi a. Hnaa inpek a pawimawhzia sawiin inpeknaah thahnemngaihna a tel a ngai a ni a ti. Commissioner chuan Engkim hi hmangaihna nena thawh anih chuan a danglam thin tih sawiin School naupangte hmangaihna nen chuan hnathawh a danglam thin a, chu rilru pua thawh chu a tul a ni a ti bawk.

He orientation trainingah hian Samagra Shiksha kalphung leh inrelbawlna kalpui dan turte, Project Approval Board minutes 2019-20 bawhzui dan turte, Sum enkawl dan leh Teacher Education kalpui dan turte an zirho dawn a. District tin atangin DPC, Additional DPC, Dy DPC te, State Project Office a State Project Director, Additional SPD, Dy SPD te an tel a ni.