Vawiin chawhma dar 11:30 khan District Council Day vawi 37-na chu M.A.D.C. Office Complex, Saiha-ah ropui taka lawm a ni. He Ni lawmna inkhawm hi Pu R.C.Zase, Chairman, M.A.D.C.,Saiha chuan a kaihruaia, kalkhawmte lawmna thu a sawi hnu ah hawnna hla Gospel Outreach Ministry ten an sa-a, hunserh Rev P. Riabi, Moderator, E.C-M. Headquarters Saiha chuan a hmang bawk a ni. He Ni lawmna ah hian thu sawiin Pu S. Khipo, Chief Executive Member, M.A.D.C. chuan District Council kan neih theihna tura tha leh zung nasa taka lo seng tawhtu vawiina kan zinga awm tawh lo te kan hrerenga an chungah lawmthu kan sawi tak meuh a ni, tiin District Council kan neih theihna tur hian Kum 1953 atang daih tawh khan nasa takin hma an lo la tawh a, Kum 1972 atang khan Pawi, Lakher leh Chakma Regional Council tiin mahni a ro inrel hran theihna kan lo nei ta a, heng zawng zawng te hi chanchintha in kan ram a rawn thlen vang a ni kan ti lo theilo a, Pathian hnenah ram mipuite hian lawmthu sawi kan ba nasa hle a ni, a ti a. District Council kan neih tan tirh lai aiin thuneihna lian zawk pawk kan nei chho zel a, Direct Funding pawh kan hma lawkah ban phakin a awm tawh a ni, a ti bawk. Tun dinhmunah hian M.A.D.C, Office ah hian hnathawktu mi 1681 an awm mek a ni. He Ni lawmna ah hian zaithiam hrang hrang te zai ngaihthlak a nih bakah hnam lam hmuhnawm tak Y.L.A. Sub-Headquarters, Saiha te leh M.T.P. Headquarters, Saiha ten an entir bawk a, Mara ram-a Missionary thlah te zinga la dam awmchhun Pi Violet L. Mark pawhin thusawina a nei bawk. Mipuiten tawngtai rualna neiin Senior Executive Secretay, Maraland Presbytarian Church (M.P.C.) in malsawm tawngtaina neiin he Ni lawmna inkhawm hi khar a ni.