Vawiin chawhma dar 11:00 khan DC’s Conference Hall, Saiha-ah Pu Alok Swarup IAS, Deputy Commissioner, Saiha District kaihhruaina hnuaiah, kan hma lawka Faina Hapta-2014 ( 2nd Oct- 8th Oct) hman dan tur relin, Head of Office te, Tlawmngai pawl hrang hrang aiawh te, chanchinbu mi te leh sawmbik ten Meeting an nei a ni. Faina Hapta hawnna inkhawm hi 2nd Oct, 2014-ah Saiha Traffic point-ah hman nise, Closing Ceremony erawh chu DC’s Conference Hall-a ni 8th Oct-a hman tura rel a ni.

Faina Hapta chhung hian Saiha khawchhunga Office hrang hrangte chu hnatlang neia, an office theuh ti fai tura ngen leh hriattir ni se, veng hrang hrang tlawmngai pawl leh VC te pawh an veng chhung mipuite chu, an mahni in leh a vel theuh tifai tura ngen tur leh an veng chhunga in leh a vel vawng faiber chhungkaw khat thlang chhuak nghal tura hriattir leh ngen ni se, tih te rel a ni.

Faina Hapta Closing Function hmanna turah hian Faina Hapta hman chunga, Veng faiber, Office fai ber, Restaurent/Canteen fai ber leh School faiberte, pakhatna atanga pathumna thleng lawmman tangka fai leh Citation pek hlawm nise, tlawmngai Pawl leh VC-te thlanchhuah Veng tina chhungkaw fai ber hnenah pawh lawmman tangka fai leh Citation pek ni bawk se, tih te rel a ni . Saiha District chhunga Faina Hapta hmanna-a la tih ngaih loh, kumin Faina Hapta-ah hian Maxi Cab, Taxi leh Auto Rickshaw fai ber thlan chhuaha, lawmmanah tangka fai leh citation pek tura rel ni bawk.