Vawiin chawhnu dar 1:00 khan Pu Hiphei, Speaker Mizoram  Legislative Assembly leh District Level Committee On SAGY Chairman ni bawk hovin DC’s Conference Hall-ah SAGY( Saansad Adharsh Gram Yojana- Model Village) chungchangah meeting-cum-Workshop neih a ni. He meeting/workshop hi  Pu Hipheia’n a kaihhruaia, Pu Paul L.Khuma, Under secretary, RD Department chuan Power Point presentation hmangin SAGY ( Saansad Adharsh Gram Yojana- Model Village) hrilfiahna leh a nihphung tur te, engtiang anga din tur nge ti te chipchiar takin committee-a kalkhawmte zirtirna a neih. Saiha District-ah hian Model Village tur khaw pahnih thlan an ni a. Chungte chu  Dr.K.Beichhua,MLA  bial (Saiha bial)-a Tuisumpui khua leh Pu Hiphei,Speaker Bial (Palak bial)-a Serkawr khua te an ni.

Vawiin meeting chuan thlakhat chhungin  Model Village a tana thlan khua mipuite hnenah resource person/trainer ten Sensitization/Awareness campaignOn SAGY  leh Base Line survey an nei ang a. chumi hnuah bialtu MLA hovin a khua mipui leh concern committee ten  VDP( Village Development plan) thla hnih chhungin an duang dawn a ni.

Pu Hiphei chuan meeting hmaah  Model Village tana ahranpa-a sum sanction a awm loh thu sawiin, a tih lawhtlinna chu  Head of Office te leh official te thawhrimna leh impumpekna a innghat a ni avangin, HoD te, SAGY Official te leh Model Village  khua mipui te chu thawhhona tha tak neia, impumpekna leh thawhrimna nena thawk turin a ngen a ni.

Dr. K. Beichhua, MLA leh Co-Chairman, District Level Committee On SAGY ni bawk pawhin Model Village hming pu zo turin Model Village a tana thlan khua mipuite pawhin an rilru lamah lo inpuachaha, rinawmna leh thawhrimna nen an inthuam a ngai dawn ni, a ti bawk.

Vawiin meeting-ah District Level Committee On SAGY, Chairman Pu Hiphei leh Co- Chairman , Dr.K. Beichhua te bakah, Model Village atana thlan Tuisumpui leh Serkawr khua VC te, HoD te, NGO hruaitute leh RD department-a official te an tel a ni.