Vawiin chawhma dar 10:00Am khan Pu Alok Swarup IAS ,Deputy Commissioner , Saiha District chuan a office chamber-ah Press Meet a vawikhatna a tan a koh. Pu Alok-a chuan Saiha District-ah June ni 4 atangin a lo awm tan chauh va, nuam a ti hman hle tawh thu sawiin, Saiha District hmasawn nan theitawp chhuaha hna thawh a tum thu a sawi.

Pu Alok-a chuan Saiha District chhunga Centrally sponsored scheme(CSS) hnuaia hmasawnna hnathawh hrang hrang kalpui mek te chu chhunzawm a ni tur thu sawiin, hna puitling leh chhenfakawm thawh dawn chuan vilh ngun a ngai a, monitoring works chu a ngaih pawimawh ber tur thil a ni , a ti.Sawizelin, Pu Alok-a chuan District Civil Hospital sak that te, inkalpawhna leh inbiakpawhna tha leh changtlung siam te, thalaite talent haichhuah nan Games&Sports-a ruahmanna tha siam te chu a ngaipawimawh hmasak tur a ni thu a sawi lang bawk.

Bawrhsap Pu Alok Swarup chuan a vawikhatna atan a chanchin thehdarhtute nena inkawmna hun tha tak an neih thei chu lawmawm a ti thu sawiin, Saiha District, MJA te chu ziakfung chauh ni lova, an tha leh zung ; theina zawng zawng hmanga Saiha District leh a chhunga cheng mipuite rawngbawl thin an nih, tih a lo hriat tawh thu a sawi a. MJA,Saiha District te chu Saiha District tan a rawngbawlnaah amah tawiawma, finchhuah thin turin a sawm nghal a ni.

He Press Meet-ah hian Pu Alok-a chuan a chanchin tlangpui sawilangin, DANICS(Delhi and Andaman&Nicobar Island Civil Services) 1982 Batch atangin kum 2001-ah IAS a 2001 a promote a ni a, Delhi-ah kum 30 chhung Department hrang hranga a thawh hnua, Saiha DC tura a lokal hi Delhi pawna a vawikhat chhuahna tur a ni a, a phur hle a ni , a ti.