Vawiin nileng khan Education Minister Pu Lalsawta leh Pu Chawngtinthanga, Parliamentary Secretary te hovin an enkawl School Education, SCERT leh Higher & Technical Education Department Officer te chu Directorate of School Education Conference Hall ah thukhawmin Department hmalak tawhna te, hmalak mekna leh hmachhawp awm te an thlir ho.

Education Minister chuan thalaite mamawh zirna chu World Class Education a ni a, chumi tihlawhtling tura officer zawng zawng ten theihtawp chhuaha tan lak a tul a ni, a ti. Mizoramah hna a vang tawh a, thalai nula leh tlangval ten India ram state hrang hrang bakah khawvel hmun hrang hranga hna an thawh theihna turin tan lak mek zel a ni tiin Minister chuan chu chu tun zirlaite tan mai nilovin thang leh thar lo la awm zel turte tan leh Mizote hnam anga kan dinchhuah theihna tura thil pawimawh tak a nih thu a sawi bawk. Zirna school tina Hindi zir reng chunga Mizo ten kan thiam thei lo lutuk chu Minister chuan ngaihmawhawm tiin a taka hman theih ngei tur leh naupangte hriatthiam theih tur zawng leh zir nuam zawnga Hindi zirtir dan te ngaihtuah chhuak turin Education Department Officer rual te chu a chah bawk.

Meeting ah hian Department-a thawkte service condition siamthat te, Contract-a lak zirtirtute regularise dan tur te, Primary School, Middle School, High School Headmaster nei lo leh Higher Secondary-a zirtirtu indaihlohna te an sawiho bawk a, Voluntary Retirement Scheme (VRS) hmanga zirtirtu thawk thei tawh lo engemaw zat pension duhte pension dan kawng leh Continuous and Comprehensive Education (CCE) nena imil tura Primary leh Middle School Text Book te ennawn leh Vocational Education chak zawka kalpui dan turte an sawiho bawk a ni.

Minister hi Education Commissioner Pu K.Lalnghinglova, IAS-in a tawiawm bawk a ni.