Vawiin chawhma dar 10 :30 khan All Mizoram Farmers Union (AMFU) Saiha District te chuan an General Conference vawi-14 na chu M.A.D.C. Forest Hall, Saiha ah hlawhtling takin an hmang.

He General Conference hi Dr Chawngkhuma Chawngthu, President, AMFU Saiha District chuan a kaihruaia, Rev Chunglinga’n hunserh a hmang a, Pu F.Chhawnmanga, Secretary, AMFU Saiha District in report tawi a pek hnuah Khuallian Pu S.B.Chipo C.E.M., M.A.D.C. chuan thu sawiin AMFU te chu mite tana entawntlak pawl ropui tak a nih thu a sawi a, ram tha tak Pathianin min pek hi kan tan malsawmna min thlentu tur leilung tha a ni a, leilung hausakna hi haichhuak tur chuan taimakna leh rinawmna a ngai a ni, a ti a, kan pi leh pu te khan rethei tih tawngkam hi an sawi ngailova, thatchhiatna hi ram tan hmelma lian tak a ni, a ti bawk. Vawiin a hnam anga kan lan theihna hi Pathianin chanchintha min pek vang a ni, tiin malsawmna ropui tak ram tha tak min pe a, a enkawl hi kan bat liau liau a ni a ti a, kan duhna hmun apiang ah hna thawh theihna tur thlaiin a ngeih em em ram a ni, a ti bawk. Kan hmachhawp tur chu kan zavaia taima taka hnathawh a ngai a ni, tiin hnathawh naah kan insiamthat a kan harh a hun tak zet a ni a ti bawk, sorkar atanga tanpuina kan dawn reng reng te pawh a taka kan hman a pawimawh a tiin AMFU member kalkhawmte chu hnathawh kawngah mite zirtirtu ni theuh turin a chah bawk.

Pu Lalhmingmuana, Programme Co-ordinator, K. V.K., Saiha, Pu Lianbika D.H.O., Saiha leh Pu K.Chhihrau, D.A.O., M.A.D.C. te pawhin he Conference ah hian thu sawina hun an hman bakah Pu V. Photlua, Treasurer, AMFU, Saiha District chuan lawmthu sawina neiin he programme hi khar a ni a, tlail dar 3:00 khan hruaitu thar thlanna an nei zui nghal a ni.