Vawiin chawhma dar 10:30AM khan Pu R.Zarzosanga, Deputy Commissioner, Saiha District, Office chamber-ah Anti-Tobacco Squad ten Meeting an nei.

He meeting hi Pu R.Zarzosanga, District Bawrhsap leh Saiha District Anti-Tobacco squad Chairman ni bawk chuan a kaihhruai a.Meeting-ah hian DLHS( District Level Household Survey) (2012-2013) Report te thlir hona neih a ni a. He report-a a landan chuan Saiha District-ah kum 15 chin chunglam mipa te zinga vaihlo kaihhnawih (Meizial tiam lovin) thil tih 82.9% an awm a, Mizoram District te zingah a sang ber Mamit District( 83.2%) dawttu a ni. Hmeichhia kum 15 chin chunglamah 79.1% an awm a, District te zingah pathumna ah a awm bawk. Meizu mipa kum 15 chin chunglamah Saiha District-ah 65.0% awm in, Mizoram district te zingah 4-na a ni a. Hmeichhia kum 15 chin chunglamah erawh 17.4% awmin, Mizoram District te zingah a hniamber Aizawl District( 15.5%) dawttu a ni thung. Hmeichhia te zinga meizu an tlemna chhan hi Saiha District hmeichhe NGO te leh kohhran nupawl ho tan lakna rahchhuah nia a hriatthu, Bawrhsap Pu R.Zarzosanga chuan a sawi. Zuk leh hmuam zirchianna GATS( Global Adult Tobacco Survey) (2009-10) & DLHS(2012-2013) khaikhinna-ah chuan Mizoram hmasawnna chu 6.8% a nih thu tarlan a ni bawk.

Kumin 2015-ah hian Anti- Tobacco Squad ten Saiha khawchhung a Office leh puipunna hmunah vawi 3 drive an nei tawh a. Vawi 1-naah mi 9 an man a, vawi 2-naah mi 3 an man a, vawi 3-naah erawh chuan tumah man an nei lo thung a ni. Vawiin meeting-ah hian anti- tobacco squad member thlak leh ruat tharna (Reconstitution) neih a ni a. COTPA 2003 leh FSSA (Food safety and standard Act) chak taka kalpui dan turte bakah, MJA, NGOs leh Kohhran ho nena thawhho dan turte sawi ho a ni bawk.

Meeting chuan 2/3/2015 khian Head of office te, NGOs leh Kohhran hrang hrang hruaitute leh Squad member te tan COTPA 2003 training buatsaih turin a rela, Head of office te chu an staff tam thei ang ber he training-naah hian hruai turin an rel bawk.