March ni 6 atanga ni 11 chhunga Sipai Lak Runpui (recruitment rally) neih dan tur thlirin vawiin khan Aizawl DC Pu Franklin Laltinkhuma hovin a pisaah mi pawimawhte an thukhawm. Meeting ah hian recruitment rally atana inbuatsaih ngaite sawihovin a kaihhnawih department hrang hrangte mawhphurhna inhrilhhriat a ni.

Tarlan tawh angin rally ah hian Soldier (General Duty) Soldier (Tradesman); Soldier (Technical); Soldier (Nursing Assistant) leh Soldier (Clerk/Storekeeper/Inventory Management) te lak a ni dawn a. Soldier (general duty) dil thei chin chu March 6, 1994 leh September 6, 1997 inkara piang, 160cms aia tawi lo, kg 48 aia zang lo, awm len zawng cm77/82, thiamna lamah Scheduled Tribe tan pawl 8 pass, Scheduled Tribe ni lo tan pawl 10 pass an ni tur a ni.

Soldier General Duty, Indian Domicile Gorkha dil thei chin chu March 6, 1994 leh September 6, 1997 inkara piang, 157cms aia tawi lo, kg 48 aia zang lo, awm len zawng cm77/82, thiamna lamah pawl 10 pass an ni tur a ni.

Soldier Tradesman dil thei chin chu March ni 6, 1992 leh September6,1997 inkara piang, cm160 aia tawi lo, kg 48 aia zang lo, awm len zawng 77/82 thiamna lamah pawl 8 pass an ni tur a ni a. Soldier Clerk/Store Keeper Technical/Inventory Management dil thei chin chu March ni 6, 1992 leh September6,1997 inkara piang, cm160 aia tawi lo, kg 48 aia zang lo, awm len zawng 77/82 thiamna lamah pawl 12 pass, subject tina mark 40% aia tlem lo hmu leh a pumpui a 50% aia hniam lo hmu chin, pawl 10 atanga 12 thleng English leh Maths/book Keeping/accounts subject lo zir tawh an ni tur a ni a. Graduate an nih pawhin an elective subject-ah Maths/Accounts/Book Keeping leh English zir chhuak an ni tur a ni.

Soldier Technical dil thei chin chu March ni 6, 1992 leh September6,1997 inkara piang, cm160 aia tawi lo, kg 48 aia zang lo, awm len zawng 77/82 thiamna lamah pawl 12 (Science) pass, subject ah Maths, Physics, Chemistry leh English la chunga mark za zelah 45 hmu pha chin emaw pawl 10 a mark za zela 50 hmu chunga AICTE recognised institute atanga engineer diploma nei an ni tur a ni.

Soldier Technical (Nursing Assistant) dil thei chin chu March ni 6, 1992 leh September6,1997 inkara piang, cm160 aia tawi lo, kg 48 aia zang lo, awm len zawng 77/82 thiamna lamah pawl 12 (Science) pass, subject ah Biology, Physics, Chemistry leh English la chunga subject tinah mark za zelah 40 leh a pumpui belhkhawma 50% hmu pha chin emaw Botany, Zoology/ Bio Science leh English a Graduate degree nei an ni tur a ni.

Heng bakah hian Games and Sports thiam mi te tan dil theih a ni a. District Sports Association hriatpui chin District level inelna, State, National leh International level ah heng Archery, Athletics, Badminton, Basketball, Boxing, Cycling, Equestrian, Football, Fencing, Gymnastics, Handball, Hockey, Judo, Kabaddi, Kayaking, Kho-kho, Karate, Shooting, Rowing, Rugby, Swimming, Table Tennis, Tennis, Taekwondo, Volleyball, Weight Lifting leh Wrestling ah te Gold emaw Silver medal dawngtute tan a dil theih a. He an medal dawn hi February 28, 2015 atanga chhiar leta kum hnih kalta chhunga an lak a ni ngei tur a ni a, chu aia hlui a nih chuan pawm a ni lovang.

Intlar ni ah hian thawmhnaw inthlakna, eitur (tiffin) ken tel a that thu leh document te chu sarang emaw file cover emaw (huh thei lova) dah turin ARO te hian intlar tumte chu a chah. Hriselna endik hunah hian beng a fai tawk loh thin avangin leh taksa a tattoo an neih avangin mi tam tak an tla thin a, chuvangin beng ti fai tur leh tattoo tihreh chu ngaipawimawh turin an chah tel bawk a ni. Sipai a tling hi mahni theihna, merit based behchhan anih avangin mibum hmang te laka fimkhur turin leh sum tam tham a sipai a luh tir thei a insawi an awm chuan chung mite chu thuneitute leh ARO te hnenah pawh hriattir(report) turin an ngen bawk a ni.

Sipai intlar nia document pawimawh ken tul te chu passport size photo copy 12 (background pawl emaw var); Residential Certificate; Birth Certificate; ST Certificate; Character Certificate (VCP/LC Chariman/Police Station/Principal atanga lak tur); kum 21 hnuai lam tan nupui neilo an ni tih ziakna unmarried certificate (VCP/LC Chairman atanga lak tur); zirna lama an lehkha pawimawhte – pawl 10 leh 12 pass tan admit card, mark sheet leh certificate, pawl 8 leh 9 pass chin tan Transfer/School leaving Certificate leh Mark Sheet; SOS, SOW, SOWW leh SOEX candidate tan relationship certificate emaw discharge book te ken tur a ni.