Vawiin khan Saihapui K ah MGNREGS hnuaia Bharat Nirman Rajiv Gandhi Sheva Kendra (BNRGSK) sum Rs. 7,83,000 senga sak VC House chu Bialtu MLA Pu K. Lalrinthanga'n a hawng.

Hawnna thu sawiin Pu K.Lalrinthanga chuan, Saihapui khaw mipui te chu an building thar chu duat leh dim taka enkawl turin a chah a. Hetianga building tha tak an neihna chhan chu Central sawrkar UPA rorelna hnuaiah sum leh paiah nasa takin ramin hma a sawn a. Chumi kal zelah chuan Scheme hrang hrang MGNREGS leh NLUP te a lo awm chho zel a. Chumi zar zotu chu kan nih mai bakah vawiinah hian Saihapui khuaah VC House tha taka lo ding ta a ni, a ti.

VC House kawt tuala hawnna inkhawm neih hi Pu K. Lalrohlua, BDO Bilkhawthlir chuan a kaihruai a. Saihapui khaw mipui te leh skul naupangte he hunah hian an tel a ni.

Saihapui VC House hawn tak hi he khuaa Skul tih loh sawrkar building awm chhun a ni a. District chhungah hetiang in hi 10 sak mek a niin hei hi hawn hmasak ber a ni. A chhuat leh a bang Cement Concrete a ni a , a chung rangva a niin pindan 3 - Meeting Hall,VC Committee room leh computer room te a awm a. Reception counter leh Toilet tepawh a awm bawk a ni.