NLUP Apex Board chu vawiin khan Chief Minister's Office Conference Hall-ah an thu khawm a.

Meeting kaihruaitu Chief Minister Pu Lal Thanhawla chuan thu hma sawiin NLUP bul tan dan chu a lungawi thlak thawkhat hle, a ti a. Line department hrang hrang ten ngawrh taka beiin NLUP dawngtute chu training pek an ni a. District thenkhatah officer ten beneficiary te hmalakna hmunhma te tlawhin chik takin engkim an enpui a. Hei hian NLUP dawngtute pawh a tiphur hle a ni, a ti a. Hmun thenkhat ah chuan kohhran hruaitu ten beneficiary te ko khawmin tawngtaina te an neih pui hial a.District tin-ah All Mizoram Farmers Union ten anmahni programme anga ngaiin NLUP tan awareness campaign nasa takin an nei a. Hetiang taka thahnem ngaih tlanna nena bul tan a lo ni ta hi a lawmawm tak meuh va ni, a ti a.

Hetih lai hian NLUP dawng tute lo tihnual a, an sum dawn ang te pawh a nihna a hmang lo tura fuih thin an awm tiin Pu Lal Thanhawla chuan NLUP chu "kan ram, kan hnam, kan zavai ta a ni" a ti a. Sorkar laipui in min en reng avangin "keimahni lam kan dik a pawimawh hle a ni," a ti bawk.

NLUP Apex Board meeting ah hian kum kalta a sum ruahman cheng vaibelchhe 234.00 hmanna leh hma lakna te thlir ho a ni a. An thu ngaihtuah zingah Kum 2011-12 chhunga sum ruahman zat leh beneficiary thlan dan tur te, NLUP Cluster area pahnih tana Consultancy Agency rawih chungchang te, NLUP enzui tura Monitoring Agency rawih chungchang te, NLUP Manual siam danglam chungchang te, Hmunphiah hralh chhuahna lam te, NLUP hnuaia thingpui chin rinluh ve chungchang te leh thil pawimawh dang te a tel a. Kum kal ta, 2010-2011 a sum ruahman atangin chhungkaw 45,139 hnenah NLUP hi sem mek a ni a. Apex Board chuan kumin 2011-2012 ah hian beneficiary tam thei ang ber tuam chhuak turin ruahmanna siam ni se an ti a ni.