School Education Department chuan a hnuai ami ang hian Saikhawthlir RMSA Secondary School sak dan chung changah a hnuai ami ang hian thuchhuah a siam :

Saikhawthlir RMSA Secondary School hi Ministry of Human Resource Development (MHRD), Government of India hnuaia Project Approval Board (PAB) in 2013-14 a an approve a ni a. Rokhawlhna eng eng emaw avangin a hna hi November, 2015 ah tan theih chauh a ni a. Contract amount chu Rs. 86,44,650.24 a ni. RMSA School atana DPR reng reng hi hun chep tak karah a school sakna hmun tur dik tak chiang taka tihfel a nih hmaa siam a ngaih thin avangin hmun hrang hranga mi tur hi a inang tlanga siam a ni tlang pui a. A tak taka thawh a nih hunah a hmun mila tih danglam leh hret hret hi a ngai lo theilo thin a. Saikhawthlir RMSA Secondary School pawh hi chutianga hmun dang te nen a ruala a project hi siam a ni. Project hi Central sawrkara thehluh a nih laiin MHRD hnuaia lo endiktu, Consultant te’n tukverh a grill dah a tel theilo tiin an paih vek a. School himna ngaihtuahin room pawimawh zual bik, entirnan, Headmaster room, Office, Computer room, etc. ah te hian grill dah ngei hi a tula hriat a ni bawk si a. Chuvangin a taka sak huna la siam rem atan Consultant-te pawm theih tur zawngin architectural design-ah hian tukverh (ventilation nena inkawp) 72 leh single ventilation 14 dah a ni a, grill erawh chu telh a ni ta lo a. A tak takah chuan HCDC lamin an sawi ang hian a design a awm zawng zawng hi vuah lovin, tukverh (ventilation nena inkawp) 54 leh single ventilation 8 chauh vuah a ni ta a. Hei hi a building leh classroom awmdan nen pawha inmil tawk tura ngaih a ni a.

National School Sanitation Manual-in a sawi angin mipa zunna (urinal unit) hi naupang 20 tan pakhat zel awm tura tih a ni a. Saikhawthlir RMSA Secondary School pawh hi enrollment zat turte ngaihtuahin 3 (pathum) hi a tawk turah ngaiin a design-ah 4 (pali) awm mahse a takah chuan Contractor hi 3 (pathum) chauh dah tir a ni ta a.

Tukverh, ventilation leh mipa zunna kim ta lo hi a bo thlau ta tihna a ni chuang lo a. Contractor hi a hnathawh ang mil zel chauh a bill siam sak a ni a. Heng thil kim ta lo aiah hian a design a tello, school in a mamawh si a ngaih tukverh (ventilation nena inkawp) 35-ah leh single ventilation 8-ah te hian grill dah a ni ve ta thung a ni. Tin, school building sak hna hi la zawh loh, hna kal lai mek a la ni a. Rualbanlote kalna tur (ramp) leh a front step-te hi chu la siam tur an ni.

Central sawrkar hian school building sakna tur an sanction hian a hmun hma laihna leh a panna kawng siamna atan hian sum dah tam an phal ngai lo a. Saikhawthlir RMSA Secondary School sakna atan pawh hian heng atan hian Rs. 45, 474/- chauh min pawm sak a. Heti chung hian a project a tello, contractor in a thawh turah pawh tello ni mahse khawtlang hmakhua ngai tak chung leh School tana tha zawk tur a nih bawk si avangin Contractor hi a kawtzawl a zau thei anga lai turin ngen a ni a. Ngenna hi ngai pawimawhin Contractor pawh hian a hna tur pangngai bakah engemaw zat school kawt hi a lai tawh nghe nghe zawk a ni. Hetiang hi thil awm dan chu a ni a. Hachhek Constituency Development Committee (HCDC)-te duh dan anga a project sanction a nih ang diak diaka School building sak hi a takah a fuh lo zawk a hriat a ni a. A hmun hma leh a taka mamawhna milin, a sum bo thlau awm chuang si lo in her rem mai a ni e. Contractor hi a thawh ang chin chauh zel bill pek a ni a.

Hetianga a hna her rem a nih avanga a tawpa sum chuang a awm ta a nih chuan School tan tho hian hman tangkai a la ni dawn a ni. Hei hi hmun danga RMSA School saknaah pawh kalpui dan tlangpui a ni a. HCDC ten thahnemngai a, Saikhawthlira School building sak mek an lo vil hi School Education Department chuan lawmawm a ti a. Chutihrual chuan Department leh Contractor-te tana hnathawh tiharsa khawp chuan inrawlh lo va, hriatthiamloh thil a awm anih pawhin media lama vawrh darh nghal mai lova Department lam zawh fiah hmasa zawk ni zel tawh se a duhawm hle ang.