Sainik School Chhingchhip, sainik school 27-na leh hawn hnuhnung ber chuan academic session thar 2018-19 atangin India rama a hmasa ber ni turin hmeichhe naupangte tan admission a hawng.

Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan sawrkar laipuiin sainik school-a hmeichhe naupangte luh a phal ta chu lawmawm a tih thu a sawi a. Hemi kawnga thahnemngai taka sawrkar laipui lo dawr thin tu a nih angin, hei hian Mizoramah hmasawn nan hmeichhia leh mipa inkarah inthliarna a awm lo tih a lantirin, hmeichhia leh mipa intluk tlanna leh hmeichhe dinhmun chawikan kawngah hma hruaitu kan ni a tilang chiang hle a ni, a ti. Krismas dawna hetiang thu lawmawm lo thleng hi Mizo mipuite tana Krismas thilpek hlu tak a ni, a ti bawk.

Sainik School Chhingchhip chuan pawl 6-a lut turin hmeichhe naupang tan admission a hawng mek a. Prospectus-cum-Application form hi Sainik School Chhingchhip leh Directorate of School Education, Aizawl ah te December 20-30, 2017 chhungin a lak theih a, January Ni 7, 2018 hian entrance exam buatsaih a ni ang. 02.07.2006 leh 01.07.2008 inkara piang te tan a dil theih a ni.