Vawiin  India Republic Day Vawi 71-na hi Sainik School, Chhingchhip te chuan an school complex ah an lawm a, Serchhip bawrhsap Dr. Lalzirmawia Chhangte, IAS chu khuallian niin hnam puanzar a pawtpharha, zirlai naupangte chibai bukna a chhanglet nghal a ni.

Khuallian Dr. Lalzirmawia Chhangte, IAS chuan thusawiin,  he ni ropui tak lawmna a Khuallian ni tura an  sawm avangin Principal leh staff te chungah  lawmthu a sawi a. Republic Day Chibai  bukin India Constitution duangtute thawhrimna leh inpekna a fak a. A bik takin Dr. BR Ambedkar chu ram mipuiten kan theihnghilh ngai dawn lo a ni a ti. Republic Day chu  lawm satliah mai lo a, ram tana inhlan thar lehna ni, Constitution in min pek kan Rights leh Fundamental duties kan kova a nghah te kan hriat thar lehna ni nise a duh thu sawiin, ram tana thawk zel tura kan Inhlan thar lehna ni atan i hmang ang u, tiin kal khawmte a fuih a ni. Mizoramin Sainik School  kan nei ve ta chu  lawmawm a tih thu  leh  hemi atana India sawrkar leh Ministry of Defence inphalna chu  ropui a tih thu te, engmah phut let nei hauh lova ram zau tak petu Chhingchhip mipuite chu fakawm  a tih thu a sawi bawk a ni.

Republic Day lawmna Mr Kamal Kishor Patni, TGT Computer Science Teacher kaihhruaia neihah hian School Adminstration
Officer, Squadron Leader, Pankaj Rawat  hnen atangin Republic  Day hman anih chhan leh  kal khawmte lawmna thu  sawi ngaihthlak  a ni a.

He hunah hian zirlai naupangte hnen atangin Items mit leh beng titlai tak tak  thlirho niin, Mizoram hmun hrang hrang  atanga kal khawm zirlai nu leh pa ten an telpui bawk a ni.

Sainik School Chhingchhip hi India rama  Sipai School tha berte zinga mi niin hmeichhe te pawh an luh theihna School a ni a, tun dinhmunah class VI - Cl VIII ah zirlai (Cadet) 164  awm mekin heng zinga 12 te hi hmeichhia zirlai (Girls Cadet) an ni a. Adminstrative Officer  hovin  thawktu  31 an awm mek a ni.