India Republic Day champha vawi 71-na chu Saitual Public Playground-ah lawm a ni a, Saitual District Bawrsap Pu C.Lalpeksanga chuan zing dar 7:00 ah Hnam Puanzar a pawt pharh a, Parade contingent-te a endik hnuah parade contingent 14 ten hnam puanzar chibai an bûk a chháng lêt.

Khuallian chuan khawvela demoracy ram lian ber India ram ropui takin ram Danpui a neih champha vawi 71-na a lo thlen hian he ni hmang tura kal zawng zawngte Republic Day chibai a buk tih sawiin Mizo Kristiante Pathianni a ni chung pawha ram ni pawimawh bik Republic Day lawm tura kal zawng zawng chungah lawmthu a sawi a, Kohhran inkhawm tibuai lo turin Saitual District Republic Day Celebration Committee chuan ruahmanna a siam a ni a ti.

India ram chuan British sawrkar awpbehna lak atangin August ni 15, 1947 khan zalenna pumhlum (Independence) a hmu a. India ramin zalenna a hmuh theihna tura nasa taka beitu India Hnampa Mahatma Gandhi leh hruaitu ropui dang tam tak, India ram tana an nunna hlu tak hlantu zawng zawngte zahna chibai a buk thar leh tih a sawi a. Zalenna neih hnuah ram inkaihhruaina tur Danpui duang turin August 29, 1947 khan member 7 awmna Danpui Duangtu Pawl chu siam niin Chairman atan Dr.B.R Ambedkar chu ruat a ni a. He pawl hian rim tak leh hah taka kum 2, thla 11 leh ni 18 lai an buaipui hnuah Ni 24 January, 1950 khan India Danpui chu peihfel a niin, Ni 26 January 1950 atang khan hman tan a lo nita a, hemi ni atang hian India ram chu mahnia ro inrel (Republic State) a lo ni ve ta a ni a ti. India Ram Danpui hi khawvela Constitution sei ber leh chipchiar ber a ni a, Danpui hnuaiah hian hnam tlem zawk, chaklo zawk leh hnuaihnung berte pawhin an dikna chanvo an hmuh ngei theihna turin humhalh tlat an ni a. Sakhaw hrang hrang betute leh zuitute pawh tumah duhsak bik leh thlei bik nei lovin India ram ropui takah hian zalenna famkim neiin ram danpui hian min humhalh tlat a ni a ti.

India ram ropui tak hian kawng tinrengah hmasawnna kawng a zawh chho mek a, khawvela ram ropui leh thiltithei ber pawl ni tur leh khawvela remna leh muanna a awm theihna tura hma latu pawimawh tak ni turin hmalam a pan mek zel a ni a ti.

District chungchang sawiin District ni tura kum 40 chuang lai mai District demand committee te leh Saitual District huamchhunga mipuiten dawhthei taka hma an lo lak tawhna chu vawiinah a hlawhtlinna hmel an hmu thei hi a lawmawm hle a. Saitual District thar enkawl tura Mizoram sawrkarin Bawrhsap hmasa ber ni tura a ruat chu lawmawm a tih thu a sawiin, hun reilote chhung pawha khawtlang hruaitute leh mipuite tawiawmna tha tak a dawn avangin lawmthu a sawi bawk a ni. Tunah hian District thar kawng tinrenga hmasawnna bul tan tur chauh an la nih avang hian hmabak tihtur an ngah dawn hle mai a; zirna tha neih, thawhhona tha leh inlungrualna tha, District khawpui kawngpui zauh, zu leh ruihhlo do leh global warming leh environment humhalh ngaih pawimawh hmasak turte a ni a ti a. Khawtlang hruaitu VC,NGO te bakah sawrkar hnathawk hrang hrangte leh mipuite Saitual District hmasawnna tura thawhpui atan tihtakzetin a sawm a ni.

Kumin Republic Day Ceremonial Parade-ah hian Contingent 14 leh MRHG Band Party te an tel a, Ceremonial Parade hi Parade Commander S.I. Malsawmdawngzuala leh 2nd Parade Commander ASI Lalrinngheta ten an kaihruai a. Govt. Higher Secondary School Saitual, Govt. High School Saitual, Graceland Adventist School Keifang te chuan Parade thiam lawmman pakhatna, pahnihna leh pathumna an la a, Contingent zawng zawngte te hnenah consolation prize pek an ni.

Republic Day lawmna neih zawh chhun dar 12-ah Republic Day Celebration Committee atanga ruat bikten Saitual Damdawi In leh Hlimna In (Girls Home) ah Republic Day lawmna thilpek an hlan a ni.