2981/2022-2023
“Armed Forces Flag Day” hi India ram pum ah kum tin December ni 7 ah, kum 1949 atang khan hman tan a ni a. Mizoram ah pawh Directorate of Sainik Welfare & Resettlement bul tumin he ni hi Aizawl ah leh District Sainik Welfare Office awmna district pali ah te hman a ni. He ni hian indona-a nun chan ta nupui fanau te, hliam tuar a remtuileilo a awm te, ex-servicemen leh hmeithai harsa zualte tanpui nan, mi tlawmngaite leh mi inphal te hnen atangin tanpuina khawn thin a ni a. Vawiin khan tanpuina hi Governor Secretariat, CMO Office, speaker, Minister, Chief Secretary leh department hrang hrang secretary ah te khawn niin Rs. 15,890 (Singkhat sangnga zariat leh sawmkua) hmuh a ni a, District Sainik Welfare Office pali ten Armed Forces Flag Day material lapel badge leh sticker an tihralna atangin thahnem tak hmuh belh tura beisei a ni bawk. Tlawmngaia thawhlawm petu zawng zawng te leh Flag Day material min chan sak tute zawng zawng chungah thinlung takin Sainik Welfare & Resettlement Department chuan lawmthu a sawi a ni.