Vawiin khan PWD Chief Engineer's Conference Hall-ah  Sihhmui- Sairang leh Bawngkawn inkar leh  Bawngkawn leh Tuirial inkar  NH 54 kawngpuidungte  a lo thawl zawk nan inrawnkhawmna pawimawh tak neih  a ni a. Meeting hi  Pu Lalmuankima Henry, Chief Engineer, Highways, PWD chuan a kaihruai a ni.

Meeting kaihruaitu Chief Engineer Pu Lalmuankima Henry chuan meeting koh a nih chhan te sawiin he kawngpui hi Aizawl khawpui pumpelhna kawngpui pawimawh tak a nih bakah Aizawl khawpui panna kawngpui lun ber a nih  thu te, Khualzinten Mizo hmelhmang an hmuh hmasakna hmun a nih thu te leh sawrkar hotulu lam atang pawha ngaihtuah hmanhmawh tura hriattirna a awm tawh thu te a sawi hmasa a. Hemi hnu hian helai kawngpuidunga veng awmte aiawhin Local Council Chairman theuh te leh CYMA hotute lam atangin harsatna a awmchhan te, sutkian a nih theih dan tur te bakah sawrkar an beisei dan te chipchiar takin ngaihthlak leh sawiho a ni.

Local Council hotute lam ten Tuirial-Bawngkawn-Sairang NH54 kawngpui tawt chhan nia an sawi tlangpui te chu -  Worshop lian leh Workshop tenau chhehvela kawngpui titawt zawnga lirthei inhung, Lirthei hun phallohna hmuna Motor Lianchi ding te, Kawngpui dunga motor silnate, sumdawng leh mimal hmalakna avanga tuihawk luankawr inhnawhkhat leh tihchhiatte bakah kawngpui nekchep zawnga hmalakna dangte a ni. Helai kawngpuidung sawithawl dan tur ngaihtuaha YMA, Local Council leh Sawrkar aiawh thukhawm te  chuan he kawngpui pawimawh tak hi a lo thawl zawk nan mipuite thlawpna a ngen hmasa a. Tin, a rang lama hnathawk turin Aizawl Bawrhsap Chairman-na hnuaiah Committee leh Task Force din a nih theih nan rawtna Chief Secretary hnenah a thehlut dawn a ni.

Vawiina Meetingah hian Aizawl Bawrhsap, Secretary, AMC, SP(traffic), SP, Aizawl District, DIPRO, Aizawl District, President CYMA, Local Council Chairman - Bawngkawn, Chaltlang, Chanmari'W', Edenthar, Hunthar, Rangvamual, Phunchawng, Sairang, Thuampui, Zemabawk'N' emaw  an aiawhte bakah SE, National Highway Division I & II, EE, National Highway Division I & II, EE, Information & Publicity, PWD, E in C Office leh SDO, PWD, Road Protection Squad te sawm an ni a. Meeting a tel tura sawm te hi an tel kim hle ani.