NF Railway ten sairang leh Bairabi inkar Rel kawng an siam mek ah leiverh (Tunnel) 23 zinga 4 chu zawh a ni ta a, nimin (Date 24th August, 2016) khan leiverh 4-na hi verh pawh niin Kolasib DC Pu H. Lalengmawia’n verhpawh hun hi a hmanpui.

Pu H. Lalengmawia IAS chuan Mizoram sorkar in chak takin a hmalakna kal zelah rel kawng laihna hna thawk mek in hmasawnna a hmu zel chu lawmawm a tih thu a sawi a, tun anga contractor ten tha thla lova hna an thawk zel chuan a zawn hun tur a bituk kum 2019-2020-ah chuan zawh hman a nih ngei a rin thu sawiin, hnathawktu te chu an harsatna ah puih a inhuam reng thu a sawi bawk.

Nimin a Rel kawng in a paltlang tur leiverh laihpawh tak hi Sushee Company laih niin, Khamrang ram chhung a awm a ni a, Metre 206 a thui a ni a. Leiverh tur zawng zawng hi 9 Km a thui a ni. Bairabi to Sairang rel kawng laih nan hian kum 2008 SOR angin 2300 crores ruahman a ni a, amaerawhchu thil man sang zelah Railway lam hian a aia tam sen a ngaih an rin thu an sawi a ni.