Vawiin khan Govt. Kolasib College-ah Hindustan Petroleum Corporation Ltd (HPLL) ten Govt. Kolasib College zirlai 130 te hnenah scholarship Rs. 6,64,700/- a pek chu sem a ni a, he hun hi Pu Lal Thanzara, Minister H & FW, I & PR etc. chuan khuallian niin a hmanpui.

Pu Lal Thanzara chuan scholarship dawng tur a thlan zirlai te a lawmpui thu sawiin, an vanneih zia hria a, tihtakzeta an zirlai te zir sauh sauh turin a fuih a. Thalaite chu nun uluk a, kawng dik zawh tur leh ruihtheih thil leh hri thalo laka fihlim tura insumtheihna nei turin a chah a. Ram inrelbawldan te hre ve thei turin an khaw hawi ti zau leh beng chhi turin a fuih bawk a ni. Sawrkarin thalaite hmasawnna turin theihtawpin hma a chhuah zel thu sawiin, Mizoram Youth Commission-in thalai tam tak chher chhuak zelin hna a hmuhsak a ni a ti. Khuallian chuan zirlai te puih nan a an Corporate Social Responsibility tihlawhtling a hmalatu Hindustan Petrolium Corporation Ltd. te chu fakawm a tih thu a sawi bawk.

Vawiin hun hmannah hian Pu H.Lalzirliana, Manager, HPCL chuan scholarship pek a nih dan te sawiin, zirlai ten `dilna an thehluh te endik a nih hnuah pawm a nih thu a sawi a. Pu KS Shetty, Head HR (Marketing) HPCL) chuan an company in hlawkna a tel atanga heng tanpuina te pek a nih thu sawiin, vawiin a scholarship dawng naupangte atangin result tha tak a beisei thu a tarlang bawk.

He huna tel ve Pu H. Lalengmawia IAS, Kolasib DC pawhin zirlaite chu rual elna rilru pu a hlawhtling ngei tura zir turin a fuih bawk a ni.

Vawiin a scholarship dawngtu te hian Bachalor Degree an zir chhung kumtin scholarship hi an dawn chhunzawm thei dawn a ni. HPCL hian an Corporate Social Responsibility tih puitlin nan Mizoram hmun hrang hrang ah Ambulance te an lo pe tawh a, Govt. Mamit College leh Saitual College-ah Scholarship hi an lo sem tawh bawk a ni.