Vawiin khan Sairang Nul Siam Association-te chuan Directorate of Agriculture leh DAO, Aizawl District Office-a thawktu zawng zawngte an nul siam atanga an thlai thar chhuah an thartem.
He thlai thartem programme Agriculture Conference Hall-a hman, Dr. C. Lalzarliana, Agriculture Director kaihhruai hi Pu K.S. Thanga, Parliamentary Secretary, Agriculture leh Pu Lalduhawma, MLA, Aizawl West-I bialtu ten an hmanpui.
He inkhawm hmanpuitu Pu K.S. Thanga chuan kuthnathawktute thawhrah hi a hlu in a ngaihsanawm a, chuvangin an hnen atanga an thlai thar dawn hi a lawmawm rualin a inthlahrunthlak a tih thu a sawi. Sorkar-in kuthnathawktute chu a ngai pawimawh a, taima si rahbi tleu laklawh tawh te, mahnia in chhanchhuak zo tawh lo tetan NLUP chu sorkarin a duan chhuah thu a sawi. Chuvangin tihtakzet leh taima taka thawk hram hram te chu Pathianin mal a sawm ngei ang a ti.
Aizawl West-I Bialtu MLA Pu Lalduhawma pawhin thu sawiin a bial chhunga Sairang khuaa nul siam chhungkaw 500 chuang lai mai te Agriculture leh Horticulture Minister leh Parliamentary Secretary te bakah Department Director ten an ngaihsak a, an mamawhte an ngaihtuah sak thin chungchangah lawmthu a sawi a. Sairang mipuite chu taima awmkhawm, englai pawha che reng mai an nih avangin an khuaah rukruten chetna hun remchang pawh an hmu ngai lo a ni a ti a, kuthnathawktute dinchhuahna chu Zoram dinchhuahna a ni a, chuvangin beka thlantui luang zawih zawiha thawh a tul thu a sawi bawk.
Sairang VCP, Pu Vanchunglura pawhin he hunah hian thu sawiin anmahni duhsaktute duhsak letna ni an hmang thei chu lawmawm a tih thu leh Sairang mipuite tan ni chhinchhiah tlak a nih thu a sawi a. Hetianga thlai inthartem hi a Pathian thu a, a Mizo bawk a ni a ti.
Sairang ruama nul an siam atang hian anhnah tel 12,000 atang tel 15,000 nitin Aizawl khawpuiah phurh luh thin a ni a. Kum khata Mai chi an tuh zat chu quintal 38 atanga 40 a ni. Nikum 2010 khan Agriculture Department atangin Mai chi quintal 10 an dawng a, kumin 2011 hian Horticulture Department atangin quintal 10 an dawng bawk.
