1980/2024-2025

Dated Saitual the 10th September, 2024 : Vawiin chawhma dar 10:00 am khan State Election comssion ruahman angin Saitual ah 2nd General Election to Sinlung Hills Council 2024 atan Draft Electoral Rolls chu DC Conference Room-ah District Election Officer Dr Lalngura Tlau, District Bawrhsap ni bawk chuan a tlangzarh.

District Election Officer Dr Lalngura Tlau chuan kalkhawmte hnenah hun ṭha leh remchang tak a awm chu lawmawm a tih thu sawiin State Election hnuaia rules chu a danglam hret avangin roll-a thun theih leh theih loh chungchangte pawh inzirtirna neih a ṭul a ni a ti a. DEO chuan tun ṭum revision hi General Election hmaa Special revision a nih thu sawiin 1st Oct 2024 a kum 18 tling tharte thun theih leh theih loh enfiah na a ni a ti.

DEO chuan Sinlung Hills Election chu term 2- na tur anih thu sawi langin Political Party, Village Level Officer leh NGO hruaitute hnenah General Election Free and Fair a awm theih nan thawhho pui ah a sawm a, mipuiten an mimal zalenna thiang tak hmanga Khawtlang, District, Constituency leh Ram hmasawnna ngaihtuah ran tur leh mimal zalenna hmang thiam turin a chah a, Mizoram State Election Commission ah draft roll publish dil a nih hnuah vawiinah tlangzarh theih a nih chu lawmawm a tih thu a sawi bawk.

He hunah hian Pu Lalthakima, Election Officer chuan Draft Electoral Roll kalphung leh buatsaih a nih dante a sawifiah bakah BLO te chu election denchhena roll a inziahluh tum te pawh hre hmasa ber leh hrechiang ber tu an nih dawn avangin roll thianghlim leh thianghlim loh chu an an kutah a awm thui hle a ni a ti.

Second General Election to Sinlung Hills Council 2024, kaltlanga buatsaih Draft Electoral Roll 2024 tlangzarh takin a tarlan danin Saitual District chhungah Constituency 4 ; 1-Khawlian, 2-Phuaibuang, 3-Suangluilawn leh 4-Vanbawng chhungah vote nei mi 8024 (mipa 4071 leh hmeichhia 3953) an awm mek a, Polling Station ah 4-NE Tlangnuam,11-Phuaibuang leh 8-Suangpuilawm ah te hian Mipa voters aiin Hmeichhe voters an tam zawk a ni.

Constituency 4 zingah 1-Khawlian ah vote nei mi 2396 (mipa 1208 leh hmeichhia 1188) awmin an tam ber a, 4-Vanbawng in dawtin vote nei mi 1951 (mipa 1009 leh hmeichhia 942) awmin an dawt a, 3-Suangpuilawn in dawt lehin voter 1934 (mipa 975 leh hmeichhia 959) awmin, 2-Phuaibuang ah voter 1743 (mipa 879 leh hmeichhia 864) awmin vote nei awm tlemna ber a ni.

Constituency 4 ah Polling Station 12 a awm mek a; 10 – Phuaibuang-I Polling Station (2-Phuaibuang Constituency) ah vote nei mi 975 awmin vote nei tamna ber Polling Station a ni a, 2 -Daido Polling Station-ah vote nei mi 405 awmin Polling Station vote awm tlemna ber a ni.

Vawiin a Draft Electoral Roll tlangzarhna ah hian election officials te, BLO te NGO pawl hrang hrang aiawh te leh party aiawhte an kalkhawm a, tlangzarh hnu hian Political Party aiawhte hnenah Draft Electoral Roll Copy khat theuh a hlan nghal a ni.

Vawiina Draft Electoral Roll tlangzarhnaah hian training neih zui nghal niin Pu Lalthakima, Election Officer chu resource person a ni a, ERO, AERO, VLO te hnenah training a pe zui nghal a ni.