1083/2024-2025

Dated Saitual the 5th July, 2024 : Vawiin khan Prof. Lalnilawma, Bialtu MLA, RD Dept changtu Minister  ni bawk chuan DC Conference Hall, Saitualah SIRD & PR hnuaia ni 3 chhung awh MASON (Mistiri) training neih tur a hawng a. He hunah hian SIRD & PR Director Pi Ethel Rothangpuii bakah Dr Khawlsiamthanga Khawlhring, Accociate Professor, SIRD & PR, Er C Lalthlansanga, Core Faculty (RE), SIRD & PR ten an tawiawm a, Dr Lalngura Tlau DC leh Pi PC Zonuntluangi PD DRDO Saitual te chuan an lo dawngsawng a ni.

He programme hi Pi Ethel Rothangpuii, Director, SIRD & PR chuan kaihruaiin SIRD chu Rural area a mite ta a nih angin  hmasawnna tur atana rawtna hrang hrang an neihte  inthlahrunglova thlen zel turin a chah a, a lo thlawna a kal ral lohna turin training chhunga theihtawp chhhuah turin a chah bawk. Saitual District chu Mistiri intodelh khua an nih ang ngei a district dangte entawn tura tan la thar zel turin a chah a, SIRD chu Govt Approved Institution niin training te chu NSQF Level IV certificate an pek tur a sawi a,  bial hmasawnna tur atana engmah indaltir tumlo bialtu MLA an nei chu vanneihthlak a  tih thu a sawi bawk.

Khuallian  Professor Lalnilawma chuan he hunah hian thu sawiin kawng engkimah zirna leh thiamna hian tawp in tai  a neilo a ti a, SIRD te pawhin awmlo ata awma kawng an dap chu lawmawm a tih thu sawiin mistiri te chu tunlai changkanna mila in her rem thiam tur leh tunlai thiamnain  a ken tel map leh drawing thlenga en thiam tura  in update zel turin a chah a,he  training pawh hi aite chhinna ang ah ngaia heng bakah hian electrict wiring, plumbing leh wielding te thlenga tih theih dan kawng  dap zel theih a nih thu a sawi. Minister chuan trainer te chu hlawk taka hmanga Govt. Approved Certificate  nei ngei turin duhsakna a hlan nghal bawk a ni.

Dr Lalngura Tlau DC Saitual pawhin thusawiin hetiang programme buatsaih a ni hi SIRD& PR te chungah lawmthu a sawi a, mistiri training-a lo tel te chu  vai mistiri te nena tehkhin fo an nih thin thu sawiin teirei peihna te, chhelna te leh dawhtheihna  kawngah te theih tawp chhuah thar turin a chah a ni. 

Pu H Vanlalawma, President, Saitual District Mistiri Association, Pu R Lalruatkima,President, YMA Sub-Headquarters te pawhin fuihna thuchah an sawi a, he hunah hian MASON (Mistiri) Trainer 27 telin mi 5 hnenah mistiri bungrua (Mason kit) sem nghal a ni bawk. 

Vawiinah vek hian Bialtu MLA chuan keifang Zawlbukah MHIP Golden jubillee a hmanpui  nghal a, Keifang  MHIP branch pathum a member te an tel tha hle. Khuallian chuan kalkhawmte hnenah  thu sawiin an lo dawnsawn danah lawmthu a sawi a,MHIP te chu midang tana ding, phut let neilo an ni tih inhrilh nawn fo turin a chah a,tharumah mipa tluklo mah se, kawng tam takah thiltithei zawka an tan chang a awm fo a ni tiin chhungkaw tana innghahna tlak NU nih tling theuh turin a chah a, Nu te chu khawtlanga inhman a pawimawh rualin mahni inchhungkhur theuh ngaihpawimawh thar turin a chah bawk.

Hei bakah hian Minister chuan Saitual khaw chhunga Multipurpose Centre sakna tur hmun hma te enfiahin a hmunah a tlawh nghal a, DC/District Sports Committee Chairman Dr Lalngura Tlau bakah Pu VL Chaka Hmar, District Sport and Youth Officer, District sport committee OB, NGO hruaitute bakah line department hrang hrang aiawhten an tawiawm a ni.