1084/2024-2025

Aizawl, the 5th July, 2024: Social Welfare & Tribal Affairs, Women & Child Development  Minister Pi Lalrinpuii chuan vawiin chawhnu dar 3:00 khan RITC Durtlangah Residential Institute & Training Centre (RITC), Training Centre for Specially-Abled Person (SAP) leh State Social Welfare & Rehabilitation Centre (SSWRC) atanga training chhuakte hnenah puanthui khawl, pheikhawk siamna bungrua leh Vocational Training Centre (VTC) certificate a sem chhuak.

Khuallian Pi Lalrinpuii chuan Department kaltlanga hmalakna leh hnathawhte pholan thiam a pawimawh thu sawiin, hei hian midangte hnenah hriatna mai bakah an tangkai pui tur angte a hrilhhriat theih phah a ni, a ti a. Social Welfare & Tribal Affairs kaltlanga a thlawna puanthui zirna buatsaih a ni leh eizawnna tluantling neih phah engemawzat an awm thin chu ropui a tih thu sawiin, heng baka training dangte leh hmachhawpte puitlin a nih theih nan theihtawp chhuah tum a nih thu a sawi a. Training chhuakte chu mahni ngaihtuahna hmanga thil danglam leh tha siam chhuak thei tura ngaihtuahna seng turin a fuih a, rinawm leh taima taka ei hmu taka thawh tum turin a fuih a. Training petute pawh thahnemngai taka thiamna tak tak pe thei tura thawk turin a fuih nghal bawk.

Social Welfare & Tribal Affairs Minister chuan Department hnuaia Training Centre neih ang angte thuamthata tihchangtlun zel tum a nih thu leh hand holding policy hnuaiah mahni kutkawiha eizawngte sawrkarin puih zel a tum thu a sawi a. Harsatna leh mamawh an neihte a hnena thlen hreh lo turin a chah a. Training chhuakte chu an thlen china duh tawk mai lova tun aia hmasawn zel tum turin a fuih a. Khawtlang hruaitute chu neitu thinlung pu chunga training centre-te enkawla tawiawm zel turin a ngen nghal bawk.

Khualzahawm ni a he hun hmanpuitu Pi Zonunthari, Jt. Secretary, Social Welfare & Tribal Affairs, Women & Child Development Department chuan nakin zel a en let theih turin Department chanchin leh hmalaknate mumal taka dahthat zel a pawimawh thu a sawi a. Social Welfare & Tribal Affairs, Women & Child Development Department chu nausen atanga tar thlenga enkawltu, chanhai leh vohbikte chawikan leh chhawmdawl kawnga hmalatu pawimawh tak a nih avangin thawktute chu an rawngbawlnate thahnemngai taka hlen chhuah zel tum turin a fuih a ni.

He hunah hian Social Welfare & Tribal Affairs Director Dr. Lalhriatzuali Ralte chuan kalkhawmte lawmna thu sawiin chanhaite chhawmdawl leh eizawnna tur thiamna pek kawnga department hmalaknate a tarlang a. Pi Lalkhumthangi, Training Instructress, SAP in hunserh a hmang a. RITC Superintendent Pi Larinhlui Sailo hnen atangin report ngaihthlak a ni a. Khawtlang hruaitute leh trainees aiawhte hnen atangin thu sawi ngaihthlak a ni a. SSWRC Superintendent Pi Lalnunmawii'n lawmthu sawiin hun hman a khar a ni.

He hunah hian RITC trainees zinga mi 25 te state fund atangin puanthui khawl leh certificate hlan an ni a. PMKVY kaltlangin mi 21 te puanthui khawl leh certificate hlan an ni bawk a. SAP trainees hmeichhia 27 te state fund kaltlangin puanthui khawl leh certificate hlan niin, PMKVY kaltlangin mi 23 te puanthui khawl, certificate leh stipend hlan an ni a. Heng bakah hian mipa trainees 9 te state fund kaltlangin puanthui khawl, certificates leh stipend hlan niin mi 5 te pheikhawk siamna bungrua leh certificate hlan an ni a. State Social Welfare & Rehabilitation Centre (SSWRC) atanga Vocational Training Course zir zo mi 28 te hnenah certificate hlan a ni bawk. 

Vawiin hun hmanah hian Directorate of Social Welfare & Tribal Affairs hotute leh thawktu hrang hrangte, Trainees leh Durtlang North khawtlang hruaitute an tel a, RITC complex-ah thing an phun nghal bawk.