1085/2024-2025
Aizawl, the 5th July, 2024: Mizo Students' Union (MSU) Gen. Hqrs. Aizawl buatsaihin zanin dar 8:00 khan Ignite Studio, Khatlaah tunhnai Under Graduate (UG) Examination result tihchhuah taka Mizo zirlai tithate lawmpuina hun hman a ni a. He hun hi Mizoram Speaker Pu Lalbiakzama chuan khuallian niin a hmanpui a, Dr. JT Vanlalngheta, Jt. Labour Commissioner, LESDE Department chu uaptu a ni.
Khuallian Pu Lalbiakzama chuan under graduate examination, 2024 a subject topper-te thinlung taka a lawmpui thu sawiin, ram tana chhawrnahawm ni turin an thiamnate chhawmnun zel tum tur leh chapo lovin inngaihtlawmna neia zirlai dangte tana entawntlak nih tum turin a fuih a. Tun dinhmun thlen tirtu Pathian theihnghilh lo turin a fuih a. Thiamna leh finna hmangin khawvel a hneh theih thu sawiin, hei hi Mizo thalaite thinlungah a intuh ngheh zel a ngai a ni, a ti a. Rahbi thar kai zirlaite chu an kalzelna turah duhsakna hlanin, nun kawng hrisel zawha ruihhlo leh a kaihhnawih laka fihlim bakah social media hman chintawk nei turin a chah bawk.
Mizoram Speaker chuan sawi chhunzawmin, he ram bak ram dang kan neih loh avangin a siam that kawngah tan lain rorelna dik lo leh hlemhletna do kawngah tang tlang zel ang u, tiin kalkhawmte a sawm a. Zonun zemawi tlawmngaihna leh hruaitu tha nihna chawinun zel a pawimawh thu a sawi a. Zirlaite chu Mizoram hming timawitu leh dinhmun sang taka dahtu nih tum tura sawmin, beih hram hramna leh teirei peihna nei turin a fuih a. Pass zo lote pawh beidawng mai lova hlawhtlinna chang tura theihtawp chhuah chhunzawm zel turin a chah a. Zirlaite hamthatna kawng dap leh tanpui kawnga zirlai pawlte hmalakna leh thahnemngaihnate fakawm a tih thu a sawi bawk.
Zanin MSU buatsaih UG Topper-te lawmpuina hunah hian subject hrang hrang 26-a topper theuhte lawmpuina thilpek hlan an ni a. Uaptu Dr. JT Vanlalngheta, Jt. Commissioner of Labour, LESDE Department leh MSU Gen. Hqrs. President Pu Samuel Zoramthanpuia'n zirlaite fuihna thu an sawi a. International Chin Affairs atangin thusawi ngaihthlak a ni bawk.
