Vawiin khan Keifang Public Playground-ah Saitual Town huam chhunga VC pasarihten Chapchar Kut an hmang a. UD&PA Minister Pu Zodintluanga chu Kut Pa niin, MIFCO Chairman Pu P.C. Zoram Sangliana, MLA chu Kut Thlengtu a ni.

Kut Pa Pu Zodintluanga chuan Chapchar Kut chu ram hrang leh hmun hranga cheng Mizote min phuarkhawmtu Kut pawimawh tak a ni, a ti a. Khawvela ram changkang zawkte chuan mahni tobul chhuikirin ke an pen mek a, an nih thin leh an nihna chu chhuang takin khawvel hriatah an au chhuahpui thin a ni, a ti a. Chutiang chiah chuan Chapchar Kut hi kan Mizona pholangtu zinga pakhat pakhat niin kan hlut chhoh thar zel a tul a ni, a ti. Hnam changkang zawkte entawn nasat avanga mahni nihna hloh a hlauhawm tiin kan Mizo-naah kan chian a ngai a, kan lungawi a ngai bawk a ni, a ti a. Hnam dangte tihdan kan entawn a nih pawhin an taimakna leh thawhrimna kan entawn tur a ni, a ti.

Pu Zodintluanga chuan ram leh hnam hmasawnna turin dan (law) ngaih pawimawh a tulzia sawiin dan zawm thatna ram apiangah mipui an zalen a, hma an sawn bawk thin, a ti a. Kan ram hmasawnna atana thawk turin ram hla taka mi te an lokal dawn lova, he ram hmasawnna tura mawhphurtu chu a mi chengte kan ni tiin Chapchar Kut hmang tura kalkhawmte chu an theihna inang lo mahse an theihna zawn theuh ah tangrualin Mizote changkan zel nan intanpui tawn turin a sawm bawk a ni.

Kut Thlengtu Pu PC Zoram Sangliana chuan Mizote kut ropui ber Chapchar Kut mai ni lovin Mizote incheina leh hnamzia rang ti lang thei tura chawivul nachang an hria chu lawmawm a ti a. A naupang ber atanga a upa ber thlengin he Kut hi inremna ni-ah hmang tura a duh thu a sawi bakah kan ram leh hnam a tun din zel nan Kut uar zawka hmang turin a sawm bawk.

Chapchar Kut lawmnaah hian tlawmngai pawl leh sikul naupangten Mizo hnam lam chi hrang hrang an entir a, zaithiam zai mawi tak tak ngaihthlak tur a awm bawk. He hun hi Chapchar Kut Organising Committee Secretary chuan lawmthu sawiin hun hnung a khar a ni.

Saitual SDO (C) Pu Donny Lalruatsanga kaihhruaiin Organizing Committee chuan Chapchar Kut lawm dan tur hi a lo duang lawk tawh a ni.