Dy. Speaker Pu R. Lalrinawma’n vawiin chawhnu khan Muthi Community Hall-ah Village Council (VC) leh tlawmngai pawl hrang hrang a kawm a, khawtlang mipui te’n an bial chhunga mamawh leh harsatna hrang hrang an thlen.
Pu R. Lalrinawma chuan a bial chhunga hmalakna leh hmasawna hrang hrang tarlangin, kan rama ruahtui chu leimin leh vanduaina thlentu atangin vanneihna-ah chantir turin ruahtui khawlna programme (Rain Water Harvesting Scheme) kalpui mek a ni, a ti a. Khawtlang hruaitute leh veng chhung mipuite taimakna leh thawhrimnate chu fakin Model Village an nih ang takin faina leh thianghlimna te, inlungrualna te, ram leh hnam hmangaihna te, tuihna leh nungcha humhalhna, zirna leh thiamna lama veng dangte entawn tlaka an veng chu siam turin a fuih a. Tunah hian hmasawna ruhrel tamtak hmachhawp mek a ni a, Muthi Water Supply Scheme leh Muthi kawng chei leh siam thatna tur sum (sanction) nghah leh beisei mek a ni tiin, a theih ang anga an harsatna te leh an thil mamawhte lo bawhzuia, tanpui leh hmalakpui a tum thu a sawi nghal a ni.
Dy. Speaker chuan vantlang hriselna a that theih nan a bial chhunga veng hrang hrangah Health Clinic Center hawn belh mek zel a nih thu a sawi a, Hrangbana College Boys hostel leh LAD park avang pawhin Muthi chuan kawngpui tha neih an thlahlel leh zual a ni tih a tarlang bawk. Pu R. Lalrinawma chuan Model Village-ah 100% literacy target an phak tawh chu lawmawm tiin khawtlang mipuite tanrualna leh inlungrualna chu a fak a ni.
Dy. Speaker hi Model Village Charged Officer, CDPO Tlangnuam ICDS ni bawk Pi Laltlanthangi, Chief Medical Officer (CMO) East Dr Lalzepuii, Aizawl District Education Officer Pu S.T Zaduna, Assistant Programe Officer Pu Lalramngaihhima-te’n tawiawmin thu sawina hun leh department hmalak dan inhrilhriatna hun an nei nghal bawk a, veng chhung tlawmngaipawl hrang hrang aiawh atangin thusawi ngaihtlak a ni bawk.
Muthi khua-ah kumin chhungin sikserh vei pakhat mah hmu a ni lo chu thil lawmawm a nih thu tarlan niin, Aizawl DEO Pu S.T. Zaduna chuan inkhawm banah Muthi School zirtirtu te kawmna hun a nei nghal bawk a ni.
Inkhawm hi Muthi VCP Pu M.S Dawngliana’n a kaihruaia a, veng mipui, tlawmngaipawl, school naupang nu leh pa, leh khawtlang hruaitu thahnem tak an kal khawm a, Dy.Speaker hi Aizawl East-I Congress Pary hruaituten an tawiawm bawk a ni.
