2689/2023-2024

Dated Saitual the 6th November 2023 : Saitual ah Di leh Mau hmanga sak Eco Polling Booth District Election Officer in a hawng.

Vawiin khan Saitual District in Mizoram MLA inthlanpui 2023 atana hman tura an sak di leh mau hmanga sak Eco Polling Booth chu Dr Lalngura Tlau, District Election Officer in a hawng.

Dr Lalngura Tlau chuan tunlai ah tawih theilo hmanna a tam ta em em a, hei vang hian environment chungchang ah inzirtirna nasa tak neih a pawimawh a ni, a ti a. Eco Polling Booth pawh heng chungchang a inzirtirna pakhat, awareness atan a rilru a nei chunga sak a ni, a ti.

Saitual District in election a an inpuahchahna te pawh sawi nghal in, thawktute thawhrimna zarah tluang taka inthlanpui an hmachhawn theih a beisei thu a sawi.

Saitual a Eco Polling station hi di leh mau hmanga sak niin, Polling station chhungah hian plastic lam chi hrim hrim hman phal a ni lova, tui leh thingpui pawh mauthei hmanga pek tura ruahman a ni. Tar chaklo leh hmeichhia te tan chawlhhahdamna tur sak a ni bawk.