2690/2023-2024

Aizawl, 06.11.2023: General Election to Mizoram Legislative Assembly, 2023 atana inpuahchahna hnuhnung ngawrh taka kalpui a ni a. Vawiin khan Polling Station hrang hranga duty turte chu dispatch centre atangin tirhchhuah an ni a. Aizawl District bikah chuan hmun pali – Brigade Field, Chaltlang Field, Venghlui Field leh Tlangnuam Field atangin tirhchhuah an ni.

Aizawl DC Pi Nazuk Kumar, DEO ni bawk chuan Election Party te tirhchhuah hi a telpui a. Nimin (05.11.2023) khan randomization of polling party neih niin, khawl hmangin polling party te polling station duty na tur chu Observer te leh party aiawhte hmaah thliar a ni. DEO Pi Nazuk Kumar chuan Polling Party te chu an duty tha taka an thawh theih a duhsak thu hlan in a thlah a. Voter te'n harsatna leh hriatthiamloh an nei a nih chuan pui tura inring reng turin a chah bawk.

Polling AMC Sports Complex, Bawngkawn atang hian 7- Tuivawl (ST) AC leh 10-Aizawl North-I (ST) AC a duty turte an chhuak a. Chaltlang Playground & Local Council House atangin 11-Aizawl North-II (ST) AC leh 12- Aizawl North-III (ST) AC chhuak in, Venghlui/ College Field & Local Council House atangin 13-Aizawl East-I AC 14-Aizawl East-II (ST) AC 18-Aizawl South-I (ST) AC 16-Aizawl West-II (ST) AC duty turte dispatch an ni a, Tlangnuam Sporting Club Field & Phillip Remthanga Indoor Stadium atangin 20-Aizawl South-III (ST) AC ,15-Aizawl West-I (ST) AC,19-Aizawl South-II (ST) AC leh 17-Aizawl West-III (ST) AC polling party te an chhuak a. BLO te’n lo dawngsawngin naktuk vote thlak ni atan an inpeih tawh hlawm hle a ni.

Aizawl District chhunga Constituency 12 ah a vaiin Polling Station 321 a awm a. Tuivawl Constituency ah 29, Aizawl North-I ah 29, Aizawl North-II ah 26, Aizawl North-II ah 20, Aizawl East-I ah 30, Aizawl East-II ah 19, Aizawl West-I ah 33, Aizawl West-II ah 26, Aizawl West-III ah 27, Aizawl South-I ah 22, Aizawl South-II ah 31 leh Aizawl South II ah 29 a awm a ni.

Postal Ballot hmangin mi 3000 chunagin vote an thlak a. Hengte hi Polling duty tur te bakah kum 80 chunglam, vote thlak tura polling station pan tura harsatna nei te leh Persons with Disabilities (PwDs) te tana mahni inlum atanga vote thlakna Home Voting facility kaltlanga vote thlakte an ni.

Election Commission of India a phut angin Model Polling Station leh Unique Polling Station siam a ni bawk a. Aizawl ah chuan Polling Station 4 chu Model Polling Station atan leh Polling Station 2 chu Unique Polling Station atan buatsaih a ni a. Aizawl North-I AC chhunga Bawngkawn-V Polling Station (Govt. J. Thankima College), Aizawl East-II AC chhunga Chhinga Veng-III Polling Station (KVM High School), Aizawl West-I AC huamchhunga Chawnpui-I Polling Station (Govt. M/S) leh Aizawl South-II AC huamchhunga Mualpui Polling Station (Govt. Aizawl College) te chu Model Polling Station a ruat an ni a. Aizawl South-II a Mission Veng II leh III Polling Station (Govt. Boys P/S leh Govt. Boys M/S) chu Unique Polling Station a cheibawl a ni.