No.2730/2021-2022

Aizawl the 26th October, 2021 : Vawiin khan DC Conference hall Saitualah Saitual District chhunga Central sawrkar sum hmanga hmasawnna hnathawh hrang hrang viltu District Development Co-ordination and Monitoring Committe/DISHA chu an Chairman Pu C. Lalrosanga MP (Lok Sabha) ho in virtual meeting neih a ni. He hunah hian department 13 hnuaia hmalakna scheme 22 chungchang sawi ho a ni.

Chairman Pu C. Lalrosanga chuan Covid - 19 hrileng avanga virtual meeting neih a tul tak thu sawiin, DC, officials, NGOs leh member dangte an tel theih avangin lawmthu a sawi.Chairman chuan DISHA Meeting chu Central sorkarin a ngai pawimawh hle a, Central sum hmanga hnathawhte chu chipchiar takin Fund petu Sawrkar laipui hian hriat an duh thin a ni a ti.

He hunah hian Tawi East A/C MLA Pu R.Lalzirliana P&E Minister pawhin tel puiin thu a sawi a. Central atangin hmasawnna lam hawi hnathawhna tur sum (Fund) kan hmu tha a, hnathawh tha erawh hmuh zui tur a awm lo fo chu veiawm a, Saitual chu District thar a nih angin District Official, District bul tantute pawh an beiseina a sang a, rinawm tak leh taima taka hna an thawh chuan an hnufual bika a rin loh thu Minister hian a sawi.

Saitual District Bawrhsap Pu VL Hruaizela Khiangte chuan inlawmna hun hmangin DISHA meeting hmasa ber an nei thei chu lawmawm a ti a, hmasawn zel tura tan an lak mek thu a sawi.

Pi Margaret Lalrinawmi Fanai Project Director DRDA chuan District report tlangpui a pe bawk a.

Meeting ah hian Agenda hrang hrang sawi a ni a, a tlangpuite chu :-
Social Welfare & Tribal Affairs Department hmalakna ah NSAP scheme hnuai ah mi 2,407 hnenah pension chi hrang hrang pek an ni a, kum 60 chunglam ah 1,415, kum 80 chung lam ah 759, widow pension ah 172, disable pension mi 61 hnenah pek a ni bawk. Eklavya Model Residential School kum 2021 atangin Ngopa ah hawn a ni bawk. PMAY (U) hnuai ah insak tanpuina mi 312 hnenah pek a ni a, Credit Link Subsidy hnuaiah mi 13 pek an ni bawk. NULM hnuaiah SHG 8 din a ni tawh a. Skill development programme hrang hrang kalpui a ni tawh bawk a, PMGSY hnuaia hmalakna leh hnathawhna te thlir ho a ni a, MP in PMGSY Phase I hi a hun takah zo thei ngei tura hma la turin department hotute a hrilh. Jal Jeevan Mission hnuaiah khaw 7 ah water supply hna thawh zawh tawh a ni a. NABARD hnuaia hnathawh Phullen & Thanglailung WSS chu Oct, 2021 an commission beisei a ni.

SBM (G) hnuaiah IHHL 134 siam a ni tawh a, Community Sanitary Complex 5 siam a ni tawh bawk a ni. NHM hnuaia hmalakn a ah covid-19 vaccine 2nd dose mi 8,160 in Ngopa RD Block ah an la tawh a, Phullen RD Block ah mi 18016 in 2nd dose an la tawh bawk. PMEGP hnuaiah application 13 approve tawh a ni a, bank lamah process mek a ni. NFSA hnuaiah Saitual district chhunga khaw hrang hranga Ration card dinhmun leh buhfai sem chhuah dan te thlir ho a ni. Samaghra leh Mid Day Meal Scheme hnuaiah 57 P/S leh 52 M/S cover a ni. Cook cum Helper hlawh pun theih ni se an duh thu Education department lam in an sawi. Fisheries Department hmalakna ah PMMSY hnuaia beneficiary thlan fel a ni tawh a amaherawhchu fund dawn a la ni lo a ni. Agriculture Department hmalakna NFSM hnuaiah thlai chi hrang hrang leh hmanrua te sem a ni a, Soil Health Card hnuaiah training leh demonstration te loneitute hnenah pek a ni bawk a. MGNREGA hnuaiah job card holder 11,916 Saitual district ah an awm a, April 2021- September 2021 chhungin Ngopa RD Block ah ni 54, Phullen RD Block ah 53, Saitual Zone ah ni 51 job card holder te hnenah inhlawhna pek tawh a ni.

Mizoram State Rural Livelihood Mission hnuaiah Phullen Block ah khaw 27 ah SHG 241 din a ni tawh a, Ngopa Block ah SHG 290 din a ni tawh a. Heng SHG member te hi PMJJBY leh PMSBY ah ziah luh (enrolled) an ni. Ngopa RD Block ah DDUGKY hnuaiah mi pa 6 in DEO training zo tawh in, Mizoram chhung leh pawn ah hna an thawk tawh a, tunah hian mi pa 4 training mek an awm bawk.

Ngopa RD Block ah BADP hnuaia hnathawh tur 9 (pakua) approve tawh a ni a, hna thawh tan a la ni lo.

Heng hmasawnna hnathawhte hi Chairman bakah member ten zawhnate pein sawifiah ngai sawifiah a. Chairman chuan Department hotute chu hnathawh huntiam tarlan awm thin chu ngai pawimawh turin a chah nawn leh a, an hmalaknaah lawmthu a sawi a ni.