Vawiin khan Chawnpui Branch YMA Hall, Saitual-ah, Cluster no. 9 Tawi huamchhunga NLUP 2^nd Phase-a tanpuina dawngtu te pualin NLUP Semna programme neih a ni a, he programme hi Home Minister leh Tawi bialtu MLA ni bawk Pu R. Lalzirliana’n a hmanpui. Home Minister hi Serlui bialtu MLA Pu K. Lalrinthanga leh Mara Autonomous District Council-a Executive Member Pu K. Chhuabei ten an tawiawm a ni.

Pu R. Lalzirliana chuan NLUP chu a tir lamah mi tam takin sem theih ang ring lo a, hemi atana pawisa a awm loh thu te an sawi a, amaherawhchu  NLUP hi mirethei te chhanchhuahna atana a tha bera ngaiin tumruh takin Sawrkar chuan a kalpui a, hlawhtling taka kalpuiin vawiin ni kan thleng te hi Pathian mawlsawmna a ni, a ti. NLUP dawngtu te chu an hlawhtlin chhoh mek thusawiin hmunphiah bik ah phei chuan mi tam takin hlawhtlinna an hmu tawh a, an hmunphiah thar te chu Mizoram pawn thawn a ni tawh a ni a ti.

Home Minister chuan NLUP dawngtu te chu rinawmna, dikna leh taimakna nena an tanpui dawn te chu hmang tura fuihin Sawrkar chu a tiam angin a awm a, NLUP an hman dik loh leh an tih hlawhchham chuan an vanduai anga, an mawh a ni dawn a ni a ti. Zahawma kan awm theih nan NLUP in dawn hi tha taka hmang turin ka chah che u a ni, a ti bawk. Mirethei zual bik – hnathawk thei lo, hmeithai, tar enkawltu neilo, leipui leh huan nei ve lo te tan a bika NLUP, Chief Minister’s NLUP Special Package chu ruahman mek anih thusawiin a dawng tur ni awm a hriat te chu VC kaltlangin Aizawl DC-a August ni 16 hma in report turin khawtlang hruaitu te a ngen nghal a ni.

Home Minister chuan NLUP tum, mirethei te chawikanna paih bakah ram ngaw siam that te, ram ngaw humhalh te leh ecological balance siamthat te chu Sawrkar Laipuiin chuan tha an tih thu leh hemi avangte an phurpui thu a sawi. NLUP avanga Budget a pun thu te leh NLUP hmalakna a that avanga RKVY hnuaia vaibelchhe 300 chuang hmuh anih tawh thu te a sawi bawk a ni.  

Home Minister Pu R Lalzirliana chuan Line Department 8 atanga Trade hrang hrang thlang beneficiaries mi 28 thlanchhuah te hnenah NLUP tanpuina cheque hi a hlan. Hemi hnu hian Hall kawt-a leh Department office-ah te beneficiaries te chu cheque hlan an ni.

Vawiin NLUP semna programme hi Pi Lalsangpuii Hmar SDO (C), Saitual chuan kaihruaiin Maj. Samuel Zothansanga, CO. Saitual chuan hunserh a hmang a, Pu Lalduhawma Sailo, VCP leh Chairman, Saitual Town Joint VC chuan lawmthu a sawi a ni.

Vawiina NLUP 2^nd Phase-a tanpuina dawngtu te chu Environment & Forests Department hnuaia beneficiaries 16; Sericulture Department hnuaia beneficiaries 143; Horticulture Department hnuaia beneficiaries 335; AH & Vety. Department  hnuaia beneficiaries 82; Soil & Water Conservation Department hnuaia beneficiaries 27; Agriculture Department hnuaia beneficiaries 115; Fisheries Department hnuaia beneficiaries 7 leh Industries Department hnuaia beneficiaries 35 te an ni.