2085/2024-2025

Saitual, the 17th September 2024: Vawiin chawhma dar 11 am khan DC Conference Hall, Saitualah India ram puma faina beihpui thlakna "Swachhata Hi Seva 2024" chu District Bawrhsap Dr. Lalngura Tlau chuan a hawng.

He hunah hian Dr. Lalngura Tlau chuan Swachhata Hi Seva 2024 hman dan turte a sawi zau a, hmalakna tur hrang hrangte a tarlang nghal a ni. Bawrhsap chuan kalkhawmte chu faina kawnga department anga hmalaknate chu thla la a DUDO hnena thehlut zel turin a chah a, he hmalakna hlawhtling tur chuan mitinte an pawimawh theuh tih a sawi. Kumin thupui 'Swabhav Swachhata- Sanskaar Swachhata', faina chu mitin nunphunga bet tlat tur a ni tih a nih avangin vawiina faina thutiam (cleanliness pledge) an neihte pawh a taka nunpui zel turin a chah nghal a ni.

He Swachhata Hi Seva 2024 hawnna hun hi Dr. Albert Vanlalliantluanga, DUDO, Saitual District in a kai hruai a. Pu VL Hruaitluanga kaihhruaina hnuaiah faina thutiam chhamrualna neih a ni a, Pu Lalzuala, SDO, PHED, Saitual Sub-Division chuan lawmthu sawinain he hun hi a khar a ni.

Faina thuthiam chu hetiang hi a  ni- Ka pianna Zoram hi nuam taka siam turin, Faina leh Thianghlimna kawngah ka theihtawp ka chhuah ang; Ka chhungte leh ka thiante pawh theihtawp chhuah turin ka zirtir zel ang. Ka inchhungah leh hnathawhnaah te bawlhhlawh ka thliar hrang ang a, bawlhhlawh ti tlemin, hman nawn theih apiang ka hmang nawn zel ang. Faina kawngah keimah atanga bul tanin, Ka chhungkua, ka veng leh ka hnathawhnaahte, Faina meichher kengtu ni turin ka intiam e.