2084/2024-2025

AIZAWL; the 17th September, 2024: Tukin zing dar 8:00AM khan Mizoram Youth Commission (MYC), Auditorium, MINECO-ah, UD&PA leh PHE department tangkawp te chuan kar hnih (17th September -2nd October)chhung awh tur SWACHHATA HI SEVA(SHS),2024) khuhhawnna programme leh Faina hnatlang an buatsaih a. Hon’ble Minister Pu K.Sapdanga chuan khuallian niin SHS,2024 khuhhawnna programme hi hmanpuiin, hnatlangah a tel zui nghal a ni. kumin Swachhata Hi Seva, 2024 hian thupuiah Swabhav Swachhata( Innate Cleanliness), Sanskaar Swachhata (Cleanliness of thought, Value and culture) tih hman a ni.

Khuallian Pu Sapdanga chuan SHS,2024 hawnna programme-ah hian thu sawiin, Mizo te hi tlangrama cheng kan ni a, kawmthlang neih leh inhnuai neih kan ni a. kan bawlhhlawh te reng reng hi kawmthlanga leh inhnuaia paih mai chi kan ni a. He kan tihdan phung hian nghet takin kan nuna bu a khuar tawh vang nge, Fai hi kan harsat hle a ni. Kum 35 kal ta khan YMA pawhin Faina beihpui thlak hi kum puanah a lo neih tawh a. YMA-ah hian thalai member nuai 2/3 vel an awm a, chung te chuan an Branch theuhva theitawp chhuahin Faina beihpui an thlak chung pawhin tun dinhmun hi kan la thleng thei chauh a ni. Khawvela ram fai tak tak chanchin te kan hre thin a, inzirtir nan pawn kan hmang thin. Mahse enga ti nge keini hi kan fai thei si lo? Inzirtir leh inkaihhruai ringawt hi a tawk ta lo a ni mai awm mang e, ti te min ngaihtuah tir a ni.Kum 2010-a Singapore kan tlawh tuma an Tourism officer in min hrilh ngun ber chu khawlaiah bawlhhlawh chhe te pawh paih loh tur leh Fine a san thu a ni. Meizial bung paih lek phei chu khang hun lai khan India pawisa in ₹3500 lai chawi tir an ni. Bawlhhlawh a paih lohna hmuna an paih avanga India mi khualzin te an Fine nasat thu leh chutiang chu pumpelh hram turin min hrilh ngun hle a ni. Ram zalen leh ralmuang kan tih te phenah hian dân bawhchhetute hremna khauh tak a awm a ni. Dân bawhchhetute hremna a awm lo chuan ralmuanna a awm theih lo a ni. YMA leh concern department atanga inzirtirna te a sawt mawh zia ka ngaihtuahin, Faina hi Dân nen thlunzawm a, inzirtir bakah thununna nena kalpui a, Fai tura intihluih nan khauh taka Dân lekkawh te hi a ngai ta mai awm mang e, ti te min ngaihtuah tir a ni, a ti.

Sawi zawmin Pu Sapa chuan Faina beihpui hrang hrang kan thlak hian, a beihpui kan thlak hun chung chauh a fai tur kan ni lova, a kamkeu-na leh khuh hawnna ang chauha ngaih zawk tur a ni. Engtik lai pawha fai reng tur kan ni, kan fai reng theih nan mimal, pawl leh department ang pawha tun aia nasa lehzuala tan la turin ka sawm che u a, duhsakna ka hlan bawk a che u, a ti.

Vawiin Swachhata Hi Seva,2024 khuhhawnna inkhawm hi Pu Lalmalsawma Pachuau, Secretary, UD&PA & Convener, State Steering Committee on Swachhata Hi Seva 2024 chuan kaihruaiin, Dr.Andrew H.Vanlaldika, Director, UD&PA & State Nodal Officer(U),SHS,2024 chuan kum 2017 atanga Swachhata Hi Seva hman chhoh a nih dan leh kumin 2024 a hman dan tur te report a pe a.Er.H.Duhkima, Chief Engineer,PHED& State Nodal Officer(G),SHS 2024 chuan kal khawm te Faina Thutiam, (Swachhata Shapath Pledge) a laktir bawk.

Swachhata Hi Seva 2024 hawnna programme hman zawh hnu hian Cleanliness Shramdaan (Faina Hnatlang) neih zui niin, hnatlang te chu group thumah inthenin, MYC kalkawng dunga bawlhhlawh chhar a phiah fai bakah hnim hnawk te samfai a ni a. UD&PA leh PHED staff te bakah Maubawk Branch YMA leh Save the Riparian te he Faina hnatlangah hian an tel a ni.

Swachhata Hi Seva Campaign hi Ministry of Housing and Urban Affairs (MoHUA) leh Department of Drinking Water and Sanitation (DDWS) te tangkawpa hmalakna niin, Swachh Bharat Mission kum 10 tlin denchhenin September ni 17 atanga October ni 2, Gandhi Jayanti thlengin he Campaign hi neih tur a ni a. Hemi hun chhung hian Faina leh Thianghlimna kawnga beihpui thlakna India ram pum huapa neih tur niin, Mizoramah pawh District khawpui bakah notified towns leh thingtlang khua zawng zawngah Faina Beihpui thlakna lian tak neih a ni ang.

Mizorama he campaign a hlawhtlin theih nan hian Chief Secretary kaihhruaina hnuaiah State Steering Committee din niin, District tinah Deputy Commissioner te kaihhruaiin District Steering Committee din vek bawk a ni.

Swachhata Hi Seva Campaign 2024 hi October ni 2,2024 a khar tur niin, he ni hi Faina Ni (Swachhata Diwas) atan hman a ni ang.

Vawiin SHS 2024 khuhhawnna programme-ah hian  AMC hotute, MYC hotute leh State Steering Committee a Sawrkar mi pawimawh tak tak te an tel a ni.