2083/2024-2025

Dated Hnahthial, the 17th September, 2024: Vawiin chawhma dar 09:30 khan Rallangtlang pengah Hnahthial District Bawrhsap Pi Rita Lalnunmawii Pachuau kaihhruaiin India ram puma Faina beihpui thlakna- Swachhata Hi Seva Campaign hawnna chu Hnahthial District-ah neih a ni.

He campaign hawnnah ah hian Bawrhsap chuan kal khawmte hnenah thu sawiin he faina beihpui neih turah hian mi tin an pawimawh thu leh faina hi mi tin kutah a innghah thu a sawi a. Swachhata Seva awmzia chu Faina service niin chutiang ang ngei chuan faina hi kan tihtur, kan tih makmawh a ngai theuh turin kalkhawmte chu a duh thu a sawi a. Mahni mai ni lovin, mahni ran vulh tinte chu enkawl tha a, midang tana hnawksak lo tura vulh turin a ngen a. Hnahthial hi faina inelnaah te pawh lawmman lo dawng tawh thin, district taima leh invawng fai tak an nihna chu chawi nung leh tura a duh thu sawiin hemi campaign atanga tanin, campaign zawh hnu thleng pawhin kawng engkimah faina uar a district dang entawntlak ni turin mahni phak tawk theuhva thawk turin Hnahthial District mipui tin te a sawm a ni.

Swachhata Hi Seva Campaign hawnna hunah hian Faina thutiam (Cleanliness Pledge) chu Sanitation Inspector, Pi Julie Hmingthansangin kaihhruaiin lak a ni a. Hemi zawh hian Hnahthial North-1 VCP Pu C. Lalbuatsaiha kaihhruaiin North-1 area hmun hrang hrang tihfai hnatlang neih nghal a ni. He campaign hi October ni 1 thleng neih tura ruahman a ni.

He campaign hawnna hunah hian Addl DC, Pu Zothanmawia Khiangte; Project Director, Pu Malsawmtluanga Fanchun; DUDO, Pu Hmingmawizuala; SDO (Sadar), Pi Esther Leihang leh SDC Pu R. Vanlalruata te an tel a ni.