2488/2025-2026

Saitual, the 18th September 2025: Vawiin khan Saitual Bawrhsap Dr. Lalngura Tlau chuan Mizoram Civil Service Combined Competitive Exam-a tling, Administrative Training Institute-a Combined Foundation Course kal mek, MCS, MFAS leh MIS officers te chu DC Conference Room-ah a kawm.

District Bawrhsap Dr. Lalngura Tlau chuan officer tling tharte chu lawmpuina a hlan a, Saitual DC Office chuan lawm takin an lo dawngsawng a ni, a ti. Bawrhsap chuan Mizoram mipuiten beiseina nen sawrkar an thlir thin tih a sawi a, an beiseina te tipuitling thei tur chuan sawrkar hnathawkte an pawimawh em em a ni tih sawiin, Mizoram hmasawn nana theih tawp chhuah turin officer te chu a chah a ni.

Bawrhsap Dr. Lalngura Tlau chuan DC inrelbawlna tha tur chuan department hrang hrang te nena thawhhona tha (convergence) neih a pawimawh tih a sawi a, department te zawk te dawm kang a, kaihhruai a tul chang te a awm thin a ni, a ti a, tanrual chuan sang tak a thlen theih tih a sawi bawk. Bawrhsap chuan inmamawh tawn vek kan nih angin officer kalkhawmte chu service tibik awm lo a, inlungrual taka thawkho turin a chah a, an service theuhah te mipui rawngbawlna rilru pua theih tawp chhuah zel turin a sawm nghal a ni.

Vawiin thutkhawmah hian Pi Rita Lalnunmawii Pachuau, Director, ATI, Pu Lalhmansanga Khiangte, Course Director & JD (Admin), Pu Lalthakima Chhangte, EO & SO Saitual, Pu Tharun Patnaik, SDO (S), Saitual te chuan officer tharte fuihna thu an sawi a, zawhna leh chhanna hun hman a ni bawk.

ATI-a MCS Combined foundation course kal mek hi MCS 17, MF&AS 14 leh MIS 3 te an ni a, Pi Rita Lalnunmawii Pachuau, Director, ATI, Pu Lalhmansanga Khiangte, Course Director & JD (Admin), ATI leh Pi Lalnunmawii Varte, Core Faculty, ATI ten an ho a, Saitual DC office an tlawh zawh hian Tamdil an tlawh leh dawn a ni.