4363/2024-2025

Saitual, the 20th February, 2025: Vawiin chawhnu dar 3:00 khan Mizoram hmun dang te rualin Saitual District-ah sawrkar flagship policy ‘Ban-a-Kaih’ hnuaia sawhthing lei leh hralh chhuah thawhkhatna bul ṭan a ni a. Saitual Bawrhsap Dr. Lalngura Tlau, District Agriculture Marketing Committee (DAMC) Chairman ni bawk chuan loneitute thar chhuah sawhthing quintal 400 truck-in a phurh chhuahte chu Saituala Secondary Collection Centre (SCC) atang a vai liam a, Sairang panpui nghal a ni.

Sawhthing vai liamna hun hi Pu V. Laldinsanga, Project Director, DRDO in a kaihruai a, Pi Hmangaihthangi Renthlei, District Agriculture Officer & Member Secretary hnen atang Saitual District-a DAMC leh SCC chungchang report tawi ngaihthlak a ni.

District Agriculture Marketing Committee (DAMC), Saitual hi October ni 8, 2024 khan din niin, din a nih atangin vawiiin thleng khan vawi sarih (7) an thu khawm tawh a. Saitual District ah hian SCC 7 a awm a, heng SCC 7 atang hian, vawiin bikah SCC 3 atangin sawhthing truck trip 8 hralh chhuah a ni. Saitual SCC atang Qtls 400, Keifang SCC atang Qtls 370 leh Phullen SCC atang Qtls 360 te hralh tura phurh chhuah a ni. Keifang SCC-a sawhthing phurhte hi  Pu Jacob Lalmalsawma, DHO, Saitual-in a vai liam a, Phullen SCC-a sawhthing te hi Pu J. Lalhmahruaia, BDO Phullen-in a vai liam bawk a ni.

Vawiinah Mizoram pumah SCC 40-ah Sawhthing buk tan a ni a, tlai dar 5 vel thlenga chhinchhiah tawh zat chu Qtls 7879 a ni. SCC thenkhat vawiina tan lo te hi naktuk lama tan turte leh karleh kar tir lama bultan turte an ni.

Sawhthing man hi SCC atanga phurh chhuah a nih atanga ni 7 chhunga tihfel hman tum a ni a. District Agricultural Marketing Committee (DAMC) atangin farmer tin hnenah Direct Beneficiary Transfer (DBT) hmanga pek chhuah an ni ang.

Vawiin Sawhthing flag off programme Saitual SCC-a neihah hian Saitual Bawrhsap Dr. Lalngura Tlau, DAMC Chairman ni bawk chuan sawhthing phur truck te a vai liam a, Pu V. Laldinsanga, PD, DRDO chuan hun kaihruaiin, Pi Hmangaihthangi Renthlei, DAO in report tawi a pe a ni. He hunah hian Pu Lalthazuala Rawite, MIFCO Chairman, Pu Benjamin Chhakchhuak, Co-opted Member DAMC, Pu Zairemkima, DCSO, Pu Lalnunpuia, Suptt, Pi Christina Lalnunfeli, SDC, Pi F. Zodingpuii, DIPRO te an tel a ni.