DIRECTORATE OF INFORMATION & PUBLIC RELATIONS, Government of Mizoram, India

4362/2024-2025

Lunglei, 2025 Ramtuk thla ni 20: Mizoram Agricultural Marketing Board (MAMB)-in a ruahman angin, Mizoram sawrkar "Bana Kaih" (Handholding) ruahmanna hnuaia thlai thar lei tur pali zinga pakhat - sawhthing hralh chhuah leh lei runpui chu vawiin, February ni 20, 2025 khan Lunglei District Agricultural Marketing Committee (DAMC) huaihawtin Lunglei District chhunga secondary collection centre (SCC) parukah kalpui ṭan a ni a. Kut hna thawktute hnen aṭanga Bana Kaih hnuaia sawhthing lei khawl sa phurh chhuah tur chu Ṭawipui North-I SCC aṭangin Lunglei District Additional Deputy Commissioner Pi Rochuangkimi Khenglawt chuan a vai liam.

Lunglei Addl DC Pi Rochuangkimi Khenglawt chuan vawiin, February ni 20 hi Mizoram State Day a nih bakah, sawrkar flagship programme hlawhtlinna bul ṭanna ni a nih avangin Mizoram leh kut hna thawktute tan ni chhinchhiah tlak tak a ni, a ti a. Lunglei District-a SCC hrang hrangah sawhthing lei dan turah ruahmanna fel tak kalpui a nih thu sawiin, ruahman lawk anga felfai leh tluang taka sawhthing lei leh hralh a nih theih nan sawhthing chingtute, society hotute, a leitute leh sawrkar official-te chu theih tawp chhuah zel turin a chah a. Kut hna thawktute'n sawhthing hralh tur an dah khawm hmuh chu phurawm a tih thu sawiin, sawrkar ruahmanna chuan kut hna thawktuteah phurna thar a pek a, thawk rimte'n hlawkna an tel a, hlawhtlinna a awm chhoh zel a beisei thu a sawi.

Ṭawipui North-I SCC MPACS Godown-a sawhthing hralh chhuah tur vai liamnaah hian Lunglei DAMC member-te, SCC enkawltu SCS hruaitute, society hruaitute leh sawhthing chingtute leh a leitute an tel a. Hemi puala inkhawm tawi buatsaih chu Lunglei DAMC Member Secretary, District Agriculture Officer Pu VL Hmangaihchhunga chuan a kaihruai a. Ṭawipui North-I secondary cluster society (SCS) Secretary, Ṭawipui North-I VCP ni bawk Pu Lalbiakngheta pawhin thu sawiin, sawrkarin Ṭawipui North-I chhehvel khaw 10 te tana hmun hla zawka inphurh kual ngai lova SCC a ruahmansak chu lawmawm an tih thu a sawi a. Sawrkarin sawhthing hralhna tur a ruahmansak chuan society member-te leh kut hna thawktute phurna nasa zawk a pek thu leh uar zawka hma lak zel an tum thu a sawi.

Lunglei DAMC hma lakna hnuaia society kal tlanga sawhthing hralh ṭan ni, vawiinah hian Lunglei District chhunga SCC pariat zinga paruk (6) - Haulawng, Hrangchalkawn, Ṭawipui North-I, Buarpui, Thenhlum leh Phairuangkai aṭangin sawhthing hi hralh chhuah a ni a. Lunglei District-a khaw hrang hranga sawhthing chingtute chuan an sawhthing tharte SCC-ah hian chhek khawmin, society kal tlangin an hralh chhuak ṭan a. Kut hna thawktute'n an phu ang ngeia hlawkna an hmuh theih nan SCC-a sawhthing leina man tur hi sawrkar chuan a hniam berah kilogram 1 ₹ 50/- turin a ruahman a. Sawhthing chingtute hian kilogram-ah ₹ 50/- aia tova hralhna an hmuh chuan an hralh thei tho dawn a ni.

Vawiina Lunglei District-a sawhthing hralh chhuah runpuiah hian quintal 1,500 vel hralh beisei a ni a. Hunbi ruahman sa angin sawhthing hi hralh chhoh zel tur niin, a thawh khatna (1st phase) atan March ni 10, 2025 thlengin Lunglei District-ah hian sawhthing quintal 4,500 vel hralh hman beisei a ni a. Hemi atan hian DAMC leh secondary collection centre enkawltu cluster society te chuan ruahmanna an siam zel dawn a ni.

Lunglei District-ah hian Bana Kaih ruahmanna hnuaia thlai chingtu society 135 an awm mek a. Sawrkar thlai thlan bik (notified crop) chi li hralhna tur secondary collection centre hi hmun pariatah awmin, a enkawltu tur cluster society hruaitute pawh ruat fel tawh an ni a. Anni ruahmanna hnuaiah hian thlai lei leh hralh hi kalpui chhoh mek a ni.

Attachment