862/2025-2026

Saitual, the 20th June, 2025: Vawiin khan Keifang Zawlbukah State Agricultural Management & Extension Training Institute (SAMETI), Aizawl chuan Saitual District-a kuthnathawktute tan Rashtriya Krishi Vikas Yojana (RKVY) Scheme hnuaiah Human Resource Development training a buatsaih a, District Bawrhsap Dr. Lalngura Tlau chu khuallian niin training hi a hawng nghal a ni.

He hunah hian District Bawrhsap Dr. Lalngura Tlau chuan thu a sawi a, SAMETI leh DAO te hmalaknain kuthnathawktute tana training pawimawh tak buatsaih a ni chu lawmawm a tih thu a sawi a, training chuan kalkhawmteah hmasawnna a thlen a, an kal lam aia an haw lam an hlawkpui theuh a beisei thu a sawi bawk. Bawrhsap chuan line department te chu an hnuaia hamthatna dawngtu “beneficiaries” te tan SAMETI te nen tangkawpin training te la buatsaih zel ni se, a ti a, pawl hrang hrang te leh line department te chu tangho a, thawhhona tha tak neih a tul a ni, a ti bawk.

Dr. Lalngura Tlau chuan Agriculture chu mihring intundinna leh innghahna pawimawh tak a nih avangin ram changkang apiangin an dah pawimawh thin tih a sawi a, kuthnathawktute, loneitute leh ran vulhtute tel loin mihring tan dam khaw chhuah theih a ni lo, a ti. Chuvangin kuhnathawktute chu anmahni theuh indah sang a, indah pawimawh thiam turin a fuih a. Bawrhsap chuan kalkhawmte chu SAMETI te nen Whatsapp hmang tea inthlunzawm reng a, harsatnate inhrilhre turin a chah a, training chu hlawkpui ngei turin a duhsakna a hlan nghal bawk a ni.

SAMETI hian Mizorama hmun hrang hrangah te pa khawi, khuai khawi, pickle siam, bawnghnute atanga siam chhuah theih chi siam dan, sa sawngbawl dan leh thil dangah te training an pe thin a. Tuna Human Resource Development Training pawh hi Mizoram chhunga district hrang hranga neih tura rua hman niin, Lawngtlai, Siaha leh Khawzawlah neih a ni tawh a ni.

Vawiin training hi Pi Hmangaihthangi Renthei, DAO, Saitual in a kai hruai a, Pi Lalnunpuii Parte, Director, SAMETI chuan “Convergence with other institutions and extension methods” tih thupui hmangin zirtirna a pe a. Pi Lalthasangi, Faculty (HRD), SAMETI chuan “Quality of an excellent employee & interpersonal communication skills” tih thupui hmanga zirtirna pein, “Mobile applications in Agriculture” tih chu Pu Vala T. Thanhnuna Tonson, Faculty (IT), SAMETI chuan a sawi zau bawk a ni. Training-ah hian Agriculture Department leh a kaihhnawih department hrang hrang aiawhte bakah Farmers Producer Company leh Farming Society aiawhte an tel a ni.