1739/2026-2027

Saitual, the 12th August, 2026: Vawiin khan District Treasury, Saitual, Accounts & Treasury, Finance Department-te bultumin Government Saitual College Auditorium-ah Family Pension dan dik lova lak chungchang inzirtirna hun ‘Sensitization Programme on Voluntary Surrender of Pension Payment Order’ hman a ni a, he hun hi Saitual District Treasury Officer Pu Joseph Lalzuitluanga’n a kaihruai.

Hun kaihruaitu Pu Joseph Lalzuitluanga chuan thu sawiin, dan dik lova pension la an awm thin avangin sorkar sumbawmin a tawrh thin thu a sawi a. Family Pension Under CCS (Pension) rules, 1972 hmanga dan dik taka pension pek chhuah a nih chuan sorkar sum tam tak humhim a ni thei dawn a ni, a ti. Saitual Treasury Officer chuan Sensitization of Family Pension hi July  ni 15, 2026 khan Assembly Annexe Conference Hall, Aizawl-ah Chief Minister zahawm tak Pu Lalduhoma’n a hawng a, district hrang hranga inhrilhhriatna nei tura hmalak nghal a ni, a ti. Saitual District-ah pension la mi 505 awmin, mi 196-te chu family pension la an nih thu a sawi. Pu Joseph Lalzuitluanga chuan khawtlang leh kohhran hruaitute leh department hotute chu certificate dik pekchhuah kawngah an pawimawh thu a sawi a, Family Pension dan dik lo a late tan mahni duh thu ngeia inpek (surrender)-na hun sorkarin September ni 30, 2026 thleng a hawng a, hun tiam chhunga inpe (surrender)-te chu sorkarin ngaidamin a rulh tir dawn loh thu a sawi. Dan dik lova la chhunzawmte chu pawisa chawitir an nih dawn thu leh chhuichhuah an nih theih nan sorkarin chak taka hma a lak tur thu a sawi.

Pi Julie Lalhlunpuii Pachuau, Accounts Officer-in hun hmangin Drawing and Disbursing Officer (DDO), khawtlang leh kohhran hruaitute mawphurhna leh hriattur inhrilhfiahna hun a hmang. Resource Person atana ruat Pi C. Lalduhawmi, Audit & Accounts Officer chuan Family Pension lak theih dante, Family pension lak theih zat te, Family Pension la thei lo te zirtirna hun a hmang a. Khawtlang leh kohhran hruaitute chu dik taka kal tur leh hriat chiante chauh certificate pe chhuak turin a chah a, an mawhphurhna san zia hrilh nawnin, sorkar hmalakna dik taka thawhpui zel turin a sawm a, zawhna leh chhanna hun an hmang chhunzawm nghal a ni. Vawiin inkhawm hi Pu Jacob Lalrinzuala, Asst. Accounts Officer chuan lawmthu sawiin hun a khar a ni.