1740/2026-2027 

Dated Khawzawl, the 12th August, 2026 : Vawiin khan Urban Development & Poverty Alleviation (UD&PA) Department Minister Pu K. Sapdanga’n Khawzawl District-a UD&PA hnuaia hma lakna hrang hrangte a hmunah tlawhin, a dinhmun leh hma lak chhunzawm dan tur a enfiah.

Minister hi Deputy Inspector General of Police Pu C. Lalnunmawia, Khawzawl Deputy Commissioner Pu K. Vanlalthiana, Khawzawl Superintendent of Police Pu F. Lalbiakzauva, District Urban Development Officer Pu Chandrakant Bagoria, UD&PA Executive Engineer Pu C. Malsawma leh official dangten an tawiawm.

Minister Pu K. Sapdanga chuan DUDO office tlawh hmasain, DUDO building-a Self Help Group-te (SHG) thil siam chhuah leh thar chhuah zawrhna tura siam 'Gram Dukan' a enfiah a, sawrkar hotute nen inkawmna hun tawi an hmang nghal a. Hemi hnu hian Zuchhip Multi-purpose Community Hall leh Vengthar Auditorium sak mekte a hmunah tlawhin, a enfiah a. Hna chak zawk leh tha zawka thawh a nih theih dan tur DUDO leh Engineer-te nen an sawiho.
Zuchhip Multi-purpose Community Hall hi SASCI hnuaiah Rs. 4,41,08,284 sengin May 1, 2023 khan sak tan a ni a. Mizo chhiar danin chhawng li-a sang a ni a, car parking, library, committee room, office, choka, mipa leh hmeichhe toilet leh inkhelhna tur hall te siam a ni dawn a. Kumina sak zawh ngei tura hma lak mek a ni.

Vengthar Auditorium hi State fund atangin Rs. 6,42,92,565 sengin August 16, 2023 a sak tan a ni a. Mizo chhiar danin chhawng hniha sang a ni a, parking, auditorium, lobby, conference room, mipa leh hmeichhe toilet te siam a ni dawn a ni.