1741/2026-2027 

Dated Serchhip, the 12^th August 2026: Sawrkar laipui Ministry of Social Justice & Empowerment chuan Scheduled Caste (SC) leh Scheduled Tribe (ST) khawsak harsa zual, kum khata cheng nuai 5 aia tam lalut pha lo, natna khirh tak tak PMJAY scheme-in a huam loh tuarte tan empanelled Hospital-a an inkawlna tanpuina atan “Dr. Ambedkar Medical Aid Scheme 2026” a rawn chhawpchhuak leh ta a. He scheme hnuaiah hian Kal (Kidney), Lung (Heart), Thin (Liver), Cancer, Thluak (Brain), Hnungzang ruh (Spinal surgery) zai ngaite leh thih hlauhawm natna khirh bik tuarte tan tanpuina dawn theih a ni. 

Inenkawlna senso hi natna azirin bithliah a ni a, Kal thlak emaw, kal zai ngai emaw tan Rs. Nuai 3.50 thleng, Cancer inenkawlna - chemo/radiotherapy late tan Rs. nuai 2.50 thleng, Thluak zai leh thih theihna natna hlauhawm bik tuarte tan Rs. nuai 2.00 thleng, Lung leh Hnungzang ruh zai ngaite tan Rs. nuai 1.50 thleng tanpuina a awm thei a ni.

Heng tanpuinate dil tur tan hian dilna form hi Dr. Ambedkar Foundation (DAF) website: dosje.gov.in ah download theih a nih bakah, Deputy Commissioner Office, Serchhip-ah office hun chhungin lak theih a ni a, he dilna form-ah hian a hnuaia tarlante hi thil tel tur a ni :

1. Tribal Certificate

2. Income Certificate

3. Ration Card/Aadhaar Card

4. Inzaina/enkawlna tur atana senso tur zat Medical Superintendent-in a sign hnan. 

5. Inenkawlna tur Hospital Account Details.

Application form leh document thil tel turte hi kim taka neih a nih hnuah, Surgery/Dialysis/Chemotherapy tih hma ni sawmpanga (15days) ah Deputy Commissioner Office ah thehluh tur a ni a, dilna hi Deputy Commissioner Office-in Dr. Ambedkar Foundation, 15, Janpath, New Delhi -110001 ah an lo thawnsak anga, uluk taka endik a nih hnuah, pawm a nih chuan inenkawlna Hospital Account-ah tanpuina sum hi inenkawina senso phurhuk nan Dr. Ambedkar Foundation lamin an rawn thun dawn a ni.