826/2025-2026

Saitual, the 11th June, 2025:  Mizoram hmun dangte rualin vawiin khan Saitual DC Bangla kawtah, District Level Committee on Green Mizoram huaihawtin 'Ruahtui khawl nan thing I phun ang u’ tih thupui thlan hmangin Green Mizoram Day 2025 chu hman a ni a, District Bawrhsap Dr. Lalngura Tlau chu khuallian niin hun a hmanpui.

He hunah hian District Bawrhsap Dr. Lalngura Tlau chuan thu a sawi a, kumina Green Mizoram Day thupui chu 'Ruahtui khawl nan thing I phun ang u’ tih a nih angin, kan ruahtui dawnte leh kan tuihna awm sa te humhalh nan thingphun uar a pawimawh a ni, a ti. 

Bawrhsap chuan Saitual District-ah VC te, school te leh hmeichhe pawl hrang hrang te hmalaknain thingphun kan uar chu lawmawm a tih thu a sawi a, chutih rualin enkawl a, chawm puitlin chu ngaih pawimawh a tul a ni, a ti. 

Dr. Lalngura Tlau chuan thingphun kawnga Saitual District hmalakna hrang hrang a tarlang a, nu te hming chawia thingphun "Ek Ped Maa Ke Naam" pawh kalpui mek a ni tih sawiin, khaw hrang hranga VC te phun tur thing tiak pawh 500 sem chhuah a ni tawh tih a sawi bawk. Vawiin hian Green Mizoram Day pualin sawrkar pisa hrang hrangah te thingphun hnatlang neih a ni dawn tih a tarlang bawk a ni.

Bawrhsap chuan Keifang-Tuirini leh Saitual-Saichal road-ah te nikum lama thingphun te humhalhna kalpui a ni dawn tih sawiin, thing phun chawm puitlin kawnga mawhphurtu turte pawh an inruat tih a sawi bawk. Bawrhsap chuan Green Mizoram Day hlawhtling tak an neih a beisei a, kalkhawmte chu an thinphunte enkawl leh chawm puitlin chu ngai pawimawh theuh turin a sawm nghal a ni. 

Vawiinah hian Saitual District Level Committee on Fire Prevention 2025 te buatsaih intihsiakna hrang hranga a ti tha zualte hnenah lawmman hlan nghal an ni. Chungte chu:-

VC kangmei veng tha ber- Village Level Fire Prevention award:  

1. NE Tlangnuam VC

2. ⁠Vanbawng VC

3. ⁠Ruallung VC

Fire Prevention week short video clip insiamsiak:  

1. Laldintluanga, Saitual Venglai 

2. ⁠C. Vanlalhriatpuia, Saitual Venglai 

3. Laldintluanga, Saitual Venglai

Fire Prevention Week flyer insiamsiak: 

1. Deborah Lalnghakmawii, PWD veng 

2. ⁠ C. Vanlalhriatpuia, Saitual Venglai 

3. ⁠Zothanpuia Khiangte, Saitual Venglai 

DC Bangla kawtah hian District Bawrhsap Dr. Lalngura Tlau leh Pu Gaurav Tyargi, SP te chuan thing phunna hun an hmang nghal a ni. Vawiin hian Green Mizoram Day 2025 pual hian Saitual District-a sawrkar pisa hrang hrangah te thingphun hnatlang neih a ni.

Vawiin hun hmanna hi Pu HP Lalbiaktluanga, Range Officer, EF&CC in a kai hruai a, District Bawrhsap Dr. Lalngura Tlau chuan thu sawiin, Pu PC Malsawmtluanga, EF &CC chuan lawmthu sawinain hun a khar a ni.

Vawiinah vek hian Phuaibuang Student Union, VIllage Council, All NGO leh Environment and Forest Department ṭangkhawm huaihawtin Green Mizoram Day denchhenin Phuaibuang khuaah Tlaizawng phun runpui neih a ni a, Pu J. Lalhmahruaia, BDO Phullen chuan he hun hi a hmanpui. Pu J. Lalhmahruaia chuan thu sawiin, thing leh mau chereu zel tur venna leh khualzin te hip thei Tlaizawng phun runpui zirlai pawl leh VC ten huaihawtna chang an hria chu fakawm tih thu a sawi a, tunlai khawvelah chuan tourism sector in hma a sawn zel a, khualzin te hip tham law law in Phuaibuang khua hi Tlaizawng khawpuiah an siam theih a beisei thu a sawi bawk.

BDO chuan khaw cheimawi nan leh environment humhalh nan kum dang zelah pawh chin chhunzawm zel tlak a ni, a ti. Green Mizoram day puala Tlaizawng phun runpuiah hian Zirlai pawl, Village Council, YMA, MUP leh MHIP te aṭangin mi 170 chuang hnatlangah thawkchhuakin thing ṭiak 1000 chuan phun bawk a ni. He hunah hian BDO Phullen bakah Pu Davy Zama, Forest Range Officer leh Pu Lallianzama, VCP phuaibuang ten programme hi an hmanpui a ni.