897/2026-2027 

Saitual, the 9th June, 2026: Vawiin khan Pradhan Mantri Surakshit Matritva Abhiyan (PMSMA) kum 10 tlin champha pualin Saitual District Hospital-ah nu naupai te pual inentirna leh zirtirna hun hman a ni.

He hun hi Dr. Zothanpari Chhakchhuak, Deputy Chief Medical Officer, Saitual District chuan kaihruaiin, kalkhawm te hnenah PMSMA hman a nih chhan leh a pawimawhna te a sawifiah a. Naupai laia inentir that a pawimawhzia tarlangin, an hriselna atana an hriat tur pawimawh hrang hrang te a hrilh bawk a ni.

He hunah hian naupai te tan a thlawn vekin inentirna buatsaih a ni a, Gynaecologist Dr. Lalduhsaka’n naupai te hriselna dinhmun a endik a, Dr. V. Lalremruata’n Ultrasound hmanga naute leh chhul dinhmun a enfiah sak bawk a ni. Naupai lo kal zawng zawng te chu BP leh Zunthlum (RBS) leh Hb te, Blood group, Hepatitis B & C bakah HIV test sak vek an ni a, an mamawh ang zela rawtna leh damdawi te pek nghal an ni.

PMSMA hi Sawrkar Laipui scheme niin thla tin ni 9-ah nau pai te tan a thlawn vekin inentirna neih thin a ni a. A tum ber chu nau pai lai a natna benvawn awm thei te hriat chhuah hma a, nu leh naute thi/hrisel lo tur venna a ni.

Saitual District Hospital chuan PMSMA kum 10 tlin lawmna pual hian naupai zawng zawng te chu thla tin inentirna hun hi lo hmang tangkai zel turin a chah a ni.