238/2026-2027

Saitual, the 22nd April, 2026: Vawiin khan Saitual District Level Committee on Gyan Bharatam Mission chu District Bawrhsap Pu Srinivas Sadi kaihhruaiin an thu khawm a, Gyan Bharatam Mission kal tlanga District level-a hmanlai kutziak (manuscript) humhalh nana hmalak dan tur te sawiho a ni.  

He hunah hian Pu Lalthanmawia, Jt. Director, Art & Culture department chuan Gyan Bharatam Mission thil tum te chu a sawi zau a, India ram chhunga hmanlai kutziak (manuscript) humhalh nana hmalakna a ni tih sawiin, Mizoramah pawh District hrang hrangah te manuscript zawn chhuah a ngaih thu a sawi bawk.

Manuscript ni tur chuan kum 75-a upa, kutziak ngeia thuziak a ni tur a ni a, hnah thel, lehkhapuan siam chawp, puan, thing emaw thira ziah a ni tur a ni. Gyan Bharatam Mission-in a tum ber chu Manuscript te humhalh a, a neitute remtihnain tunlai thiamna hmanga vawn that (Digitize) hi a ni a, a tak (original) erawh a neitute kutah a awm zui zel ang.

Vawiin thutkhawmah hian khawtlang hruaitute leh kohhrana hotute hnenah lehkha pek ni se tih rel a ni a, an ni hian an theih ang angin Manuscript zawn chhuah kawngah hma an lo la dawn a ni. Report awm te chu Pu Laldingliana, DEO, GBM Nodal Officer ni bawk hnenah thehluh tur a ni a, report hi khawn khawm a nih hunah DC hnenah thehluh leh tur niin, State level-a thawn thlak leh a ni ang. Manuscript zawng chhuak tute chuan Gyan Bharatam Mobile Application hmang pawhin an thehlut thei a ni.

Vawiin thutkhawm hi District Bawrhsap Pu Srinivas Sadi-in a kai hruai a, Pu Lalthanmawia, Jt. Director, Art & Culture department leh District Level Committee on Gyan Bharatam Mission member te an tel a ni.