3820/2024-2025

Saitual, 16th January, 2025 (Ningani): Vawiin khan Naupiang leh mitthi chhinchhiahtu, Registrar of Birth & Deaths, (RBD) Saitual District te tan Annual training ni hnihna,  Chawnpui Branch YMA Hall Saitualah neih a ni a, District Bawrhsap Dr.Lalngura Tlau chu khuallian niin hun a hmanpui.

Khuallian chuan thu sawiin,  inchhiarna hi sawrkarin a ngai pawimawh telh telh a, kan pian pun dan leh thih dan chhinchhiah fel chu ram hmasawna hnathawh nan thil pawimawh tak a ni a, chuvangin  RBD te chu ram hmasawnna inghahna, a bul thut leh kailawn an nih thu a sawi a, an hriat sa bakah thil thar an zir turte pawh țha taka zir turin a chah. 

Khuallian chuan Certificate pek chhuah kawnga fimkhur tura chahin 'Roll revision neih changa kum upa leh țhankin tawh Birth certificate thar nei an awm leh nawlh țhin te chu thil rinhlelhawm a ni theia, tin, state pawna thi, tualchhunga death certificate pek awm thei te, dam reng si, death certificate pekchhuah palh awm thei lakah thawktute chu fimkhur lehzual turin a chah a, nau piang thar damdawi ina zaa za neihtir tum ni mahse loh theih lova hmun danga nau nei palh an awm a nih pawhin chhui kim tum turin a chah bawk.

Khuallian, District bawrhsap ni bawk chuan Economics & Statistics Deptt thawktute zarah District statistic changtlung tak, kum khat chhung emaw, hunbi remchan anga eibar thar chhuah dan chhinchhiahna (Economics data) tihchhuah theih hun a nghahhlelh thu leh a beisei thu a sawi bawk.

Vawiin training hi Pu Lalnghinglova DRO Saitual chuan hun kaihruaiin, Pu Lalmanliana, Asst Director leh Pu Michael Lalremsanga Rivung Economics & Statistic Deptt chuan kalkhawmte power Point presentation hmangin zirtirna an pe a, Saitual District huam chhunga  Reporting Unit 48 atangin RDB an kal a ni.