508/2025-2026

Saitual, the 21st May, 2025: Vawiin khan Samagra Shiksha, Saitual District leh School Education Dept, Mizoram tangkawp buatsaihin Saitual District chhunga zirlai naupang HSLC leh HSSLC-a ti thate lawmpuina ‘Proficiency Award’ hlanna hun chu Keifang YMA Zawlbuk, Keifangah hman a ni a, District Bawrhsap, District Education Committee Chairman ni bawk, Dr. Lalngura Tlau chu khuallian niin hun a hmanpui.

He hunah hian khuallian Dr. Lalngura Tlau chuan zirlai HSLC leh HSSLC pass thar te chu a lawmpui thu a sawi a, an zir chhoh zelna turah an nu leh pate leh an Mizo nihna te chawisang zel turin a chah a. Bawrhsap chuan zirlaite chu hlawhtling tur chuan taimak piah lamah teirei peih a ngai tih sawiin, an thlen chin atanga hma sawn tum zel turin a fuih bawk a ni.

Dr. Lalngura Tlau chuan nu leh pate leh zirtirtute chu naupang than lenna kawngah mawhphurhna sang tak an nei tih a sawi a, naupangte chu an zirlai piah lamah mahnia an inenkawl theihna tur leh mahni kea an din chhuah theihna turin thiamna hrang hrang-soft skills leh life skills te zirtir tel thin turin a chah a, ram tana mi hman tlak chher chhuak ngei turin a fuih ni. Bawrhsap chuan zirtirtute chu harsatna an neih phawt chuan an harsatnate District Education Committee hnenah thlen thin turin a chah nghal a ni.

Vawiina Proficiency Award hlanna hun hi Pu Micky R. Lalenkawla, DEO & DPC, Samagra Shiksha, Saitual chuan a kai hruai a, khuallian Dr. Lalngura Tlau chuan thu sawiin lawmman hlanna a nei nghal a ni.

Vawiinah vek hian nikum August, 2024-a Hnahthial District-a hawn tawh, District Level Education Reforms Campaign, 2025 kharna neih nghal a ni a, mithiam sawm bik- resource person atan Rev. Dr. Thanzauva, Education Consultant, Govt. of Mizoram & Member, MERC leh Dr. Tawnenga, Member, MERC te chu ruat an ni. Education Reforms Campaign hi Lesson Plan Training & Promotional Campaign, 2025-in a chhunzawm nghal a, Resource person atan Rev. Dr. Thanzauva, Education Consultant, Govt. of Mizoram & Member, MERC chu ruat a ni.