2578/2024-2025

Saitual, the 17th October, 2024: Vawiin chawhma dar 10:30 am khan DC Conference Hall Saitualah, District Election Officer, District Bawrhsap ni bawk Dr. Lalngura Tlau kaihhruainain 2nd General Election to Sinlung Hills Council 2024 a Political Party hrang hrang Candidate-te training buatsaih a ni.

Hun kaihruaitu Dr. Lalngura Tlau chuan thu sawiin, training nei tura lo kal candidate te, election agent te leh party aiawhte chungah lawm thu a sawi a. Sinlung Hills Council 2024 inthlan lo awm turah hian inthlanna muanawm leh felfai tak an neih theih a beisei thu a sawi a, chumi tur chuan kalkhawmte chu theih tawp chhuah a training hlawk thlak tak nei turin a sawm a ni. DEO chuan hriat loh neih hi thil zahthlak a ni lo a ti a, training naa zawhna neite chu inthlahrung loa zawt zel turin a chah nghal a ni.

Sinlung Hills Council 2024 atana State Election Commission (SEC) in observer-a a ruat Pu H. Lalhmingthanga pawhin thu a sawi a, inthlanna muanawm leh thianghlim a awm theih nan kalkhawmte chu Model Code of Conduct zawm hram hram turin a chah a. Boruak nuam tak hnuaiah election an neih theih a beisei thu sawiin, candidate te chu duhsakna a hlan nghal bawk a ni.

Master trainer Pi Christina Lalnunfeli, SDC chuan Model Code of Conduct hnuaia kaihhruaina tlangpuite sawi zauvin, inthlang turte tana tih tur leh tih loh turte a tarlang nghal a. The Mizoram (Election to Sinlung Hills) Rules, 2019 hnuaia inthlanna lama dan bawhchhiatna awm theite a sawi bawk a ni. Master trainer dang Pi Helen Zomuanthangi, ARDO chuan election expenditure chungchang leh account vawn dante a sawi zau a ni.

He 2nd General Election to Sinlung Hills Council 2024 training hi District Election Officer Dr. Lalngura Tlau chuan a kaihruai a, Pi Christina Lalnunfeli, SDC leh Pi Helen Zomuanthangi, ARDO te chu Master Trainer an ni. Pu H. Lalhmingthanga, Observer, Pu Lalthakima Chhangte, Election Officer, leh Constituency pali-a Returning Officers- Pu David Lalchhuanawma, Pu Micky R Lalenkawla, Pu H Lalhmangaihzuala leh Pu Zohmangaiha Tochhawng te an tel a, training tur hian candidate te, election agent leh party aiawhte an kal khawm a ni.