1580/2025-2026

Saitual, the 24th September, 2025: Vawiin khan DC Conference Room Saitualah, District Bawrhsap Dr. Lalngura Tlau kaihhruainain Aadhaar enrolment chungchangah thutkhawmna neih a ni.

He hunah hian District Bawrhsap Dr. Lalngura Tlau chuan Aadhaar operation kalphung a sawifiah a, tunlaiah engkim tih dawnin Aadhaar neih a tul tih a sawi. Mizoramah chuan awareness tha taka kalpui a nih avangin Aadhaar enrolment pawh a tha hle tih a sawi a, chutih rualin Aadhaar enrolment-a rate fix sa ni lo anga pawisa inchawitir a awm thin chu pawi a tih thu a sawi bawk.

Bawrhsap chuan sawrkar scheme pawimawh tak taka hamthatna dawng tur chuan Aadhaar neih a ngaih thin avangin kalkhawmte chu enrolment kawnga hma la a, theih tawp chhuah zel turin a chah bawk a ni.

Vawiin thutkhawmah hian SMO, DEO leh DSWO te chu Aadhaar enrolment operators tur te lo zawng chhuak tura tih an ni a, Operators te hian exam an pal tlang leh a ngaih dawn avangin Pi Christina Lalnunfeli, Nodal Officer, UIDAI leh DC office-a Aadhaar operators te hoin exam kalphung inhrilhhriatna hun neih leh tura rua hman a ni a. Aadhaar enrolment operators awm sa te list siam an rel bawk a ni.

Vawiin thutkhawm hi District Bawrhsap Dr. Lalngura Tlau chuan a kai hruai a, Pi Christina Lalnunfeli, SDC & Nodal Officer, UIDAI, Pu Thomas V. Sailo, Postmaster, Dr. Vanlalchhuanga, MO, Pu Vanlalnghaka, Social Welfare dept, Pu R. Lalhmangaiha Dy DPC leh Pi F. Zodingpuii, DIPRO te an tel a ni.