1507/2025-2026

Saitual, the 19th September, 2025: Ministry of Tribal Affairs (MoTA) hmalaknain tribal mite chawikanna tura duan Aadi Karmayogi Abhiyan - Responsive Governance Programme chu India ram hmun hrang hrangah kalpui mek a ni a, Saitual District-ah pawh September ni 17-19 chhung hian Pi Christina Lalnunfeli, SDC leh District Nodal Officer ni bawk kaihhruaina hnuaiah Block Master Trainers ten District Process Lab chu tluang takin an zo fel.

District Process Lab kharna hunah hian Saitual Bawrhsap Dr. Lalngura Tlau chuan thu a sawi a, Saitual District chu zone thum (3)-a then niin Saitual, Phullen leh Ngopa zone-ah te then a ni, a ti a. Block Master Trainers (BMT) te chuan an zone theuha VC te, khawtlang mipuite zirtirna an pe chhawng leh dawn a ni tih a sawi.

Dr. Lalngura Tlau chuan he programme ina a tum pakhat chu kum 5 chhungin tribal mite hmasawnna tur ruahmanna (vision plan) mumal tak siam a ni, a ti a, India sawrkar chuan kum 2047-ah India ram chu ram intodelh (Vikshit Bharat-2047) ah hlan kai a tum tih a sawi bawk. Bawrhsap chuan BMT te chu Village Action Plan an siam hunah te fimkhur turin a chah a, khawtlang tana hmasawnna tak tak thlen tur duang thiam turin a chah a ni.

Dr. Lalngura Tlau chuan MoTA chuan tribal mite chu mahni inrintawkna nei turin a duh a ni, a ti a, he programme pawh hi tribal miten huaisenna nena ke an pen theih nan leh mahni inringtawk an neih theih nana an rilru puthmang thlakna tura hmalakna pawimawh tak a ni, a ti. Bawrhsap chuan BMT te chu Saitual District hmasawnna nan theih tawp chhuah zel turin a chah a, an training pekna tur theuhah te duhsakna a hlan nghal bawk a ni.

Karmayogi Abhiyan hnuaiah hian Saitual District atang District Master Trainers pariat thlan chhuah an ni a, an ni hi September ni 1-4 thleng Aizawlah State Master trainers kahhruainain training an nei tawh a. September ni 11 khan Saitual District-ah District Process Lab hawnna “Orientation training” neih niin, September ni 17-19 chhung hian District Master Trainers te chuan Block Master Trainers te hi zirtirna an pe a, an ni hian an zone theuhah te Block Nodal Officers te kaihhruainain zirtirna hi an pe chhawng leh dawn a ni.