581/2025-2026

Saitual, the 26th May, 2025: Vawiin chawhma khan DC Conference Room, Saitualah, District Bawrhsap Dr. Lalngura Tlau kaihhruainain Bana Kaih (Handholding) scheme hnuaia thlan chhuah ‘progress partner’ te chu an thlen chin leh hmabak la awm te sawihhoin line department te leh branch manager te an thu khawm.

He hunah hian District Bawrhsap Dr. Lalngura Tlau chuan kalkhawmte hnenah lawmthu a sawi a, Banakaih (Handholding) scheme chu sawrkar flagship programme pawimawh tak a ni tih sawiin, a hlawhtlin ngei theih nana chak taka hmalatu line department te leh branch manager te chu fakawm a tih thu a sawi bawk.

Bawrhsap chuan Mizoram Planning Board hnuaia Mizoram State Policy Coordination Committee chuan Saitual District-a mi 1000 chuang dil zingah mi 36 a thlang chhuak tih sawiin, heng mi 36 te tan hian Orientation training bakah line department lam atang briefing kalpui a ni, a ti a. Bawrhsap chuan line department te leh branch manager te chu he scheme a hlawhtlin theih nan progress partner te chinchang chhui zui a, theih tawp chhuahpui turin a ngen nghal a ni.

Vawiin thutkhawmah hian progress partner mi 36 te chu an thlen chinte leh loan lakna kawnga an harsatna tawhte tarlan niin, a chinfel dan tur te sawiho nghal a ni a. Mi 36 zingah hian mi 3 te chu loan pek (disbursed) tawh an ni a, mi 2 te chu inhnukdawkin, loan pek theih zat kum bithliah aia upa 2 an awm bawk a ni.

Vawiin thutkhawm hi District Bawrhsap Dr. Lalngura Tlau chuan a kaihruai a, Bana Kaih scheme hnuaia line department hotute leh bank hrang hranga branch manager te an tel a ni.