1351/2024-2025

Dated Saitual the 29th July 2024 : Vawiin khan District Consumer Protection Council Committee vawi 1-na chu Saitual Bawrhsap Dr. Lalngura Tlau hovin DC Conference Room-ah meeting neih a ni a. He hunah hian District Consumer Protection Council hmaklakna tur hrang hrang leh hriat tur pawimawh inhrilhhriatnate neih a nih bakah thil tul dang pawimawhte sawi ho a ni.

Chairman Dr. Lalngura Tlau chuan kalkhawmte hnenah lawmthu sawiin District Level Consumer Protection Council a awm chu lawmawm a tih thu a sawi a, mipuite hian kan dikna chanvo kan hriat tawk loh thin avangin  sumdawngten sum tam tak min eisak fo thin a ni a ti a. Mipuiten mahni rights theuh hrechiang lehzual tura veng/khawtina consumer union din  tha a tih thu a sawi bawk. Mipuite hi consumer leh service provider kan nih kawp fo avang hian buaina leh harsatna tamtak a awm thin a, chutihrualin inbumna kawng tam tam tak laka mitinten an dikna chanvo theuhte an humhalh theih nan  theihtawp chhuah tlang theuh turin kalkhawmte a chah bawk. 

Meeting-ah hian District Level Consumer Protection Council memberte atangin consumerte'n harsatna an tawh thinte an sawi bakah Legal Metrology awm tura hmalakte, mipuite hnena  awareness neih dan turte, ration card leh gas chungchanga harsatna awm thin chinfel dan turte leh thu pawimawh dangte rel a ni.

Vawiin meeting-ah hian  Pu Lalthakima Chhangte, SDO Sadar bakah Pu Zairemkima DCSO Saitual, Line department aiawh, Mizoram merchant Association, Saitual District Consumer Union aiawh bakah NGO aiawhte an tel thei a ni.